हिमायतनगर, उत्कर्ष मादसवार| हिमायतनगर नगरपंचायतच्या सार्वत्रिक निवडणुकीत वार्ड क्रमांक १ मधून भारतीय जनता पार्टीच्या अधिकृत उमेदवार सौ. दर्शना शरद चायल यांनी प्रचंड मताधिक्याने विजय मिळविला. हा नाभिक समाजाच्या महिलेचा ऐतिहासिक विजय असून, या विजयाच्या निमित्ताने दि. ३ जानेवारीला क्रांतीज्योती सावित्रीबाई फुले यांच्या जयंतीचे औचित्य साधून नाभिक समाजाच्या वतीने भव्य सत्कार करून शुभेच्छा देण्यात आल्या.
महाराष्ट्र नाभिक महामंडळाचे तालुका अध्यक्ष तथा भाजपा तालुका अध्यक्ष गजानन चायल यांच्या नेतृत्वाखाली हिमायतनगर येथील नाभिक समाज बांधवांनी नवनिर्वाचित नगरसेविका सौ. दर्शना चायल यांच्या निवासस्थानी भेट देऊन पुष्पहार, शाल व क्रांतीज्योती सावित्रीबाई फुले यांची प्रतिमा भेट देत स्वागत सत्कार केला. यावेळी त्यांना पुढील राजकीय व सामाजिक वाटचालीसाठी शुभेच्छा देण्यात आल्या. हिमायतनगर नगरपंचायत निवडणूक अत्यंत चुरशीची झाली, त्यात वार्ड क्रमांक १ मधून सौ. दर्शना शरद चायल यांचा दणदणीत विजय चर्चेचा विषय ठरला.
या सत्कार प्रसंगी महाराष्ट्र नाभिक महामंडळाचे जिल्हा उपाध्यक्ष दिलीप शिंदे, दिलीप कोंडामंगल, सचिन कळसे, नरसय्या अण्णा गंधम, व्यंकटी गंधम, प्रकाश घुंगरे, रमेश लिंगमपल्ले, लक्ष्मण मोतेवार, बाबुराव सोळंके, सुभाष राचटकर, चंद्रकांत कळसे, आनंदराव गायकवाड, श्रीकांत घुंगरे, तालुका उपाध्यक्ष नागेश शिंदे, गणेश वाघबरे, पप्पू सोळंके, रवी जोनापल्ले, मारोती जोनापल्ले, राजू सूरजवाड, अवधूत गायकवाड, अंकुश शिंदे यांच्यासह नाभिक समाजाचे असंख्य पदाधिकारी व समाजबांधव मोठ्या संख्येने उपस्थित होते. हा सत्कार कार्यक्रम नाभिक समाजासाठी अभिमानाचा क्षण ठरला असून, महिलांच्या राजकीय सहभागाला बळ देणारा महत्त्वाचा संदेश यातून देण्यात आला.
