नवीन नांदेड | नांदेड जिल्ह्यातील लोहा तालुक्यातील किवळा येथे हजरत शाहुसेन मस्तान साहेब दर्गा ऊरूस शरीफ निमित्त आयोजित करण्यात आलेल्या कुस्ती दंगलीत महाराष्ट्रातील विविध जिल्ह्यांतील नामवंत पहेलवानांनी सहभाग नोंदवून आखाडा गाजवला. पारंपरिक जल्लोष, हलगीचा नाद आणि प्रेक्षकांचा उत्साह यामुळे संपूर्ण परिसर कुस्तीमय झाला होता.
या मानाच्या कुस्ती दंगलीची सुरुवात उपमुख्यमंत्री अजित पवार यांच्या प्रतिमेला पुष्पहार अर्पण करून करण्यात आली. त्यानंतर रूद्रगिर महाराज यांच्या हस्ते कुस्ती दंगलीचे उद्घाटन करण्यात आले. कार्यक्रमास माजी सभापती शंकर पाटील ढगे, सरपंच प्रतिनिधी साईनाथ पाटील टरके, तसेच ग्रामस्थ व मान्यवर मोठ्या संख्येने उपस्थित होते.
कुस्ती दंगलीतील शेवटची आणि मानाची कुस्ती किवळा येथील माळेगाव केसरी अच्युत दिगंबर टरके व खाजा (परभणी) यांच्यात झाली. दोन्ही पहेलवानांनी आक्रमक व तांत्रिक डावपेचांची रंगतदार लढत सादर केली. सामना अत्यंत चुरशीचा ठरल्याने पंच समितीने ही कुस्ती बरोबरीत घोषित केली. यावेळी उपस्थित प्रेक्षकांनी जल्लोष करत पहेलवानांचे कौतुक केले.
दरवर्षीप्रमाणे यंदाही रूद्रगिर गुरूदयाळगिर महाराज मठ संस्थान, ग्रामपंचायत कार्यालय किवळा, तंटामुक्त समिती, सेवा सहकारी सोसायटी व समस्त ग्रामस्थांच्या वतीने कुस्ती दंगल आयोजित करण्यात आली होती. शंभर ते सहा हजार रुपयांपर्यंतच्या अनेक कुस्त्या लावण्यात आल्या असून विविध जिल्ह्यांतील पहेलवानांनी आपल्या ताकदीचे व कौशल्याचे प्रदर्शन केले.
कुस्ती दंगलीसाठी निरंजन टरके, जगनाथ टरके, राजू टरके, वैभव जाधव, नामदेव मोकले, पंजाब टरके, प्रभाकर टरके आदींनी पंच म्हणून काम पाहिले. निवेदनाची जबाबदारी भालचंद्र रणशूर (जवळा बाजार) यांनी उत्कृष्टपणे पार पाडली.
कार्यक्रमासाठी मोठ्या संख्येने प्रेक्षक उपस्थित होते. कुस्ती दंगल शांततेत पार पडावी यासाठी सोनखेड पोलीस स्टेशनचे सहाय्यक पोलीस निरीक्षक माने यांच्या मार्गदर्शनाखाली पोलीस बंदोबस्त तैनात करण्यात आला होता. कुस्ती दंगलीनंतर सहभागी पहेलवान व प्रेक्षकांनी हजरत शाहुसेन मस्तान साहेब दर्गा येथे दर्शन घेऊन कार्यक्रमाची सांगता केली.
