मुंबई | अखिल भारतीय मराठी पत्रकार परिषदेच्या वतीने दरवर्षी दिले जाणारे पत्रमहर्षी रंगाअण्णा वैद्य आदर्श जिल्हा पत्रकार संघ व वसंतराव काणे आदर्श तालुका पत्रकार संघ हे राज्यस्तरीय प्रतिष्ठेचे पुरस्कार यंदा २२ फेब्रुवारी २०२६, रविवार रोजी रायगड जिल्ह्यातील कर्जत येथे वितरित करण्यात येणार आहेत. कर्जत येथील रॉयल गार्डन येथे सकाळी ११ वाजता हा भव्य पुरस्कार वितरण सोहळा व राज्यातील तालुका अध्यक्षांचा मेळावा आयोजित करण्यात आला असल्याची माहिती परिषदेचे मार्गदर्शक एस. एम. देशमुख यांनी दिली.
ग्रामीण महाराष्ट्रात कार्यरत असलेले अनेक तालुका पत्रकार संघ केवळ उत्कृष्ट पत्रकारिताच नव्हे, तर समाजोपयोगी उपक्रमांद्वारेही आपले योगदान देत असतात. त्यांच्या या कार्याचा राज्यस्तरीय सन्मान व्हावा, या उद्देशाने प्रत्येक महसूल विभागातून एका तालुका पत्रकार संघाची निवड करण्यात येते. यंदा विशेष बाब म्हणून विदर्भातून दोन तालुका पत्रकार संघांना, तसेच मुंबई विभागातून एका पत्रकार संघाला हा सन्मान जाहीर करण्यात आला आहे.
यापूर्वी हे पुरस्कार नागपूर, पाटण, अक्कलकोट, गंगाखेड, नगर जिल्ह्यातील कर्जत, माहूर, सेलू, वडवणी, पालघर आदी ठिकाणी मान्यवरांच्या उपस्थितीत प्रदान करण्यात आले आहेत. यंदा हा मानाचा सोहळा रायगड जिल्ह्यातील कर्जत येथे होत आहे. पुरस्कार स्वरूपात मानपत्र, मानचिन्ह, शाल व श्रीफळ प्रदान करण्यात येणार असून, हे पुरस्कार राज्यात अत्यंत प्रतिष्ठेचे मानले जातात.
२०२५ चे पुरस्कार मानकरी
पत्रमहर्षी रंगाअण्णा वैद्य आदर्श जिल्हा पत्रकार संघ पुरस्कार परभणी जिल्हा पत्रकार संघ
वसंतराव काणे आदर्श तालुका पत्रकार संघ पुरस्कार
नागपूर विभाग : बेला तालुका पत्रकार संघ, जि. नागपूर
नागपूर विभाग : चामोर्शी तालुका पत्रकार संघ, जि. गडचिरोली
नाशिक विभाग : नांदगाव–मनमाड मराठी पत्रकार संघ, जि. नाशिक
कोंकण विभाग : पनवेल महानगर प्रेस क्लब, जि. रायगड
पुणे विभाग : आंबेगाव तालुका पत्रकार संघ, जि. पुणे
लातूर विभाग : किनवट तालुका पत्रकार संघ, जि. नांदेड
संभाजीनगर विभाग : अंबाजोगाई तालुका पत्रकार संघ, जि. बीड
अमरावती विभाग : संग्रामपूर तालुका पत्रकार संघ, जि. बुलढाणा
कोल्हापूर विभाग : पलूस तालुका मराठी पत्रकार संघ, जि. सांगली
मुंबई विभाग : उपनगर पत्रकार असोसिएशन.
या पुरस्कार वितरण सोहळ्यास मोठ्या संख्येने उपस्थित राहावे, असे आवाहन एस. एम. देशमुख, अध्यक्ष मिलिंद अष्टीवकर, विश्वस्त किरण नाईक, शरद पाबळे, कार्याध्यक्ष शिवराज काटकर, सरचिटणीस सुरेश नाईकवाडे, कोषाध्यक्ष मन्सूरभाई शेख, डिजिटल मीडिया परिषदेचे अध्यक्ष अनिल वाघमारे, महिला आघाडी प्रमुख शोभा जयपूरकर, कोकण विभागीय सचिव मनोज खांबे, रायगड प्रेस क्लबचे अध्यक्ष प्रशांत गोपाळे, कर्जत प्रेस क्लबचे अध्यक्ष संजय मोहिते, दर्वेश पालकर आदी मान्यवरांनी केले आहे. हा सोहळा महाराष्ट्रातील पत्रकार संघटनांच्या कार्याचा गौरव करणारा ठरणार असल्याने राज्यभरातील पत्रकारांचे लक्ष या कार्यक्रमाकडे लागले आहे.
