नांदेड| महाराष्ट्र राज्य बॅडमिंटन असोसिएशन अंतर्गत नांदेड शहर व जिल्हा बॅडमिंटन असोसिएशन यांच्या विद्यमाने मराठवाड्याचे भाग्यविधाते भारताचे माजी गृहमंत्री कै. शंकररावजी चव्हाण यांचा जयंती निमित्त 21व्या महाराष्ट्र ज्युनिअर बॅडमिंटन स्पर्धेला आज थाटात सुरुवात झाली . माजी मंत्री डी. पी. सावंत , भोकर विधानसभा मतदारसंघाच्या आमदार श्रीजया अशोकराव चव्हाण आणि जिल्हाधिकारी राहुल कर्डिले यांच्या हस्ते या स्पर्धेचा शुभारंभ आज सकाळी करण्यात आला. या स्पर्धा यशवंत कॉलेज,स्पोर्ट्स कॉम्प्लेक्स,नांदेड घेतल्या जात आहेत.
स्पर्धेच्या उद्घाटनाच्या अध्यक्षस्थानी जिल्हा बॅडमिंटन असोसिएशनचे अध्यक्ष तथा माजी मंत्री डी.पी. सावंत यांची उपस्थिती होती.तर आ. आ.श्रीजया चव्हाण यांच्या हस्ते स्पर्धेचे उद्घाटन करण्यात आले. जिल्हाधिकारी राहुल कर्डिले , महाराष्ट्र बॅडमिंटन असोसिएशनचे सचिव सिद्धार्थ पाटील, जिल्हा बॅडमिंटन असोसिएशनचे उपाध्यक्ष बी.के.मोहन ,जिल्हा क्रीडा अधिकारी यांचे प्रतिनिधी बालाजी शिरसीकर , सचिव महेश वाकरडकर , रवी कडगे , मुख्य पंच पारिजात नातू ,अनिरुद्ध जोशी आदी मान्यवरांची उपस्थिती होती. उद्घाटन सत्राचे सूत्रसंचालन अश्विन बोरकर यांनी केले.
उद्घाटन प्रसंगी बोलताना आ. श्रीजया चव्हाण म्हणाल्या की , आज आधुनिक भगीरथ तथा भारताचे माजी केंद्रीय गृहमंत्री डॉ. शंकरराव चव्हाण यांची जयंती आहे आणि आजच्या दिवशी या राज्यस्तरीय स्पर्धेचे उद्घाटन होते आहे हा अत्यंत महत्त्वपूर्ण असा योग आहे. स्वर्गीय शंकरराव चव्हाण साहेबांनी नेहमीच नांदेड जिल्ह्याच्या क्रीडा क्षेत्राच्या भरभराटीसाठी स्वप्न पाहिले होते.
हे स्वप्न साकार करण्याचे काम या राज्यस्तरीय बॅडमिंटन स्पर्धेतून होत असल्याचे त्या म्हणाल्या. या स्पर्धा खेळीमेळीच्या वातावरणात पार पाडाव्यात. प्रत्येक स्पर्धकांनी उत्कृष्ट खेळ करून आपला नावलौकिक करावा अशा शुभेच्छा ही आ. श्रीजया चव्हाण यांनी यावेळी दिल्या. कार्यक्रमाचे अध्यक्ष स्थानावरून बोलताना नांदेड जिल्हा बॅडमिंटन असोसिएशनचे अध्यक्ष तथा माजी मंत्री सावंत म्हणाले की, गेल्या 21 वर्षापासून ही स्पर्धा आम्ही आयोजित करीत आहोत.
या स्पर्धेमुळे नांदेड जिल्ह्यात अगदी ग्रामीण पातळीपर्यंत उत्कृष्ट बॅडमिंटनपटू तयार होत आहेत याचा आम्हाला मनस्वी अभिमान आहे. गत वीस वर्षांपूर्वी नांदेड जिल्ह्यात बॅडमिंटन खेळण्यासाठी एकही कोर्ट नव्हते परंतु आत्ता तब्बल 15 हून अधिक बॅडमिंटन कोर्ट नांदेड शहर आणि जिल्ह्यामध्ये आहेत. ही या स्पर्धेची यशस्वीता आहे .भविष्यातही सर्वोत्कृष्ट खेळाडू घडवण्यासाठी स्पर्धा मोलाची भूमिका पार पाडेल असा विश्वासही त्यांनी व्यक्त केला. तर आयोजित स्पर्धेला जिल्हाधिकारी राहुल कर्डिले यांनीही शुभेच्छा दिल्या.