नांदेड| जिल्ह्यात दुष्काळसदृश परिस्थिती निर्माण झाल्याने अनेक भागांत खरीप पिकांचे नुकसान झाले आहे. त्यामुळे शेतकऱ्यांनी मुदतपूर्व पीक काढणी, पीक मोडणे अथवा नांगरणी करू नये. पीक कापणी प्रयोगासाठी निवड झालेल्या शेतकऱ्यांनी प्रयोग पूर्ण होईपर्यंत पीक शेतात ठेवून प्रशासनाला सहकार्य करावे, असे आवाहन जिल्हाधिकारी राहुल कर्डिले यांनी केले आहे.
प्रधानमंत्री पीक विमा योजना व शासनाच्या नियमानुसार प्रत्यक्ष उत्पादनातील घट निश्चित करण्यासाठी पीक कापणी प्रयोगाची आकडेवारी महत्त्वाची आहे. प्रयोग पारदर्शक पद्धतीने व्हावा यासाठी महसूल, कृषी व ग्रामविकास विभागाचे अधिकारी, विमा कंपनीचे प्रतिनिधी आणि स्थानिक प्रगतिशील शेतकऱ्यांच्या उपस्थितीत प्रयोग करण्यात येत आहेत. प्रयोगाची छायाचित्रे व आवश्यक माहिती CCE ॲपवर नोंदविली जात आहे.
दरम्यान, पीक पूर्णपणे वाळून गेले किंवा नष्ट झाले असल्यास ‘शून्य उत्पादन पंचनामा’ (Zero Yield Report) करण्याची तरतूद आहे. त्यामुळे अशा पिकांचीही मुदतपूर्व कापणी न करता संबंधित यंत्रणेला माहिती द्यावी.
पीक कापणी प्रयोग अपूर्ण राहिल्यास महसूल मंडळाच्या उत्पादनाची आकडेवारी तसेच पीक विमा भरपाई प्रक्रियेत तांत्रिक अडचणी निर्माण होऊ शकतात. त्यामुळे शेतकरी व लोकप्रतिनिधींनी प्रयोग वेळेत आणि नियमानुसार पूर्ण करण्यासाठी क्षेत्रीय कर्मचाऱ्यांना सहकार्य करावे, असे आवाहन जिल्हा प्रशासनाने केले आहे.
