हिमायतनगर, अनिल मादसवार | हिमायतनगर नगरपंचायत निवडणुकीला सुरुवात होताच राजकीय वातावरण तापले असून, आज दिनांक 21 नोव्हेंबर रोजी उमेदवारी मागे घेण्याच्या प्रक्रियेदरम्यान ठाकरे सेनेचे माजी नगराध्यक्ष कुणाल राठोड आणि राष्ट्रवादी काँग्रेस (अजितदादा गट) यांचे नेते मोहम्मद जावेद यांच्यात जोरदार तणाव निर्माण झाला.
शहरातील 17 नगरसेवक आणि एक नगराध्यक्ष पदासाठी निवडणूक होत असताना, नामांकन परत घेण्याच्या दिवशी वार्ड क्रमांक 9 मध्ये मोठा गोंधळ झाल्याचे प्रत्यक्षदर्शींनी सांगितले. राष्ट्रवादीचे उमेदवार पांचमासे यांना अर्ज मागे घ्यायला लावला असा आरोप होत असल्याने परिस्थिती चिघळली. ठाकरे व राष्ट्रवादी दोन्ही गटांच्या कार्यकर्त्यांमध्ये वाद, धक्काबुक्की व गदारोळ झाल्याचे चित्र तहसील कार्यालय परिसरात झाल्याचे पाहायला मिळाले.
ही संपूर्ण घटना सोशल मीडियावर वेगाने व्हायरल होत असून, नागरिकांमध्येही या घटनेची चर्चा जोरात रंगली आहे. उमेदवारी मागे घेण्यावरून सुरू झालेला वाद आता राजकीय मतभेद टोकाला पोहोचल्याचे स्पष्ट दिसत आहे. निवडणुकीचा प्रचार अजून वेग घेण्याआधीच संघर्षाच्या ठिणग्या पडल्याने आगामी दिवसांत हिमायतनगरचे राजकारण आणखी तापणार आहे.
दरम्यान, आज काँग्रेसमधील नाराज नेते व कार्यकर्त्यांनी मोठ्या प्रमाणात दाखल केलेल्या अपक्ष उमेदवारी अर्जावर पक्षाने मनधरणी करून नियंत्रण मिळवले असून, अनेकांनी अर्ज मागे घेतले आहेत. त्यामुळे हिमायतनगरच्या निवडणुकीत आता चौरंगी लढतीची शक्यता बळावली आहे.
ही बातमी लिहीपर्यंत किती उमेदवारांनी अर्ज मागे घेतले याबाबत अंतिम आकडे उपलब्ध नसले तरी प्रमुख राजकीय पक्षांनी आपल्या नाराज उमेदवारांना अखाड्यातून बाहेर काढण्यात मोठे यश मिळवल्याचे बोलले जात आहे. त्यामुळे त्यांच्या बाजूने समीकरणे अधिक मजबूत होण्यास मदत मिळणार आहे. एकूणच, हिमायतनगर नगरपंचायत निवडणूक थराराच्या उंबरठ्यावर पोहोचली असून, सुरुवातीलाच उडालेला राजकीय ठिणगीसारखा संघर्ष निवडणुकीत रंगत आणणार हे निश्चित!
