उस्माननगर, माणिक भिसे| शहरातील डॉक्टर लाईन भागामध्ये सार्वजनिक रस्त्यावर एक मनोरुग्ण महिला गोंधळ घालून तिच्याकडील एका लहान बाळाला मारहाण करत असल्याची माहिती मिळताच वजिराबाद पोलीस कर्मचारी शरद सोनटक्के व त्यांच्या सहकाऱ्यांनी तिथे जाऊन सदर महिलेस ताब्यात घेऊन तिला उपचारासाठी विष्णुपुरी शासकीय रुग्णालयात तर तिच्या बाळाला शिशुगृहात दाखल केले आहे.
सोमवार दिनांक 19 ऑगस्ट रोजी रक्षाबंधनानिमित्त शहरात आज सर्वत्र महिलांचा पवित्र सण असल्याने मोठ्या प्रमाणात रस्त्यावरून ये-जा सुरू होती. यातच डॉक्टर लाईन भागात एक महिला गोंधळ घालत असल्याची माहिती पोलीस निरीक्षक परमेश्वर कदम यांना सांगण्यात आली. त्यांनी लगलीच कर्तव्यावर दक्ष असलेल्या पोलीस कर्मचारी शरद सोनटक्के यांना व महिला कर्मचाऱ्यांना तिथे पाठवले. पोलिसांनी सदर महिलेस ताब्यात घेऊन तिची विचारपूस केली असता ती मनोरुग्ण असल्याचे पोलिसांच्या लक्षात आले.
तिच्याजवळ असलेल्या एक वर्षाच्या बाळाला पोलिसांनी ताब्यात घेऊन शिशुगृहात त्याची रवानगी केली. तर सदर महिलेस विष्णुपुरीच्या शासकीय रुग्णालयात दाखल केले. पो.क शरद सोनटक्के व महीला पो.क. यांच्या शोर्याचे वरिष्ठ अधिकारी यांनी कोतुक केले आहे
