हिमायतनगर, प्रतिनिधी| महसूल विभागात पारदर्शक, लोकाभिमुख आणि कार्यक्षम प्रशासनाची प्रभावी छाप उमटवणाऱ्या हिमायतनगरच्या तहसीलदार पल्लवी टेमकर यांना महसूल दिनानिमित्त ‘आदर्श तहसीलदार’ पुरस्काराने सन्मानित करण्यात आले. जिल्हाधिकारी राहुल कर्डीले यांच्या हस्ते झालेल्या या गौरवामुळे हिमायतनगर तालुक्याच्या शिरपेचात आणखी एक मानाचा तुरा खोवला गेला आहे.
तहसीलदार पल्लवी टेमकर यांनी महसूल प्रशासनातील पारदर्शकता, नागरिकांना वेळेत सेवा, निवडणूक व्यवस्थापन, मतदार यादीचे काम, आपत्ती व्यवस्थापन तसेच शासनाच्या विविध योजनांची प्रभावी अंमलबजावणी करून प्रशासनात वेगळी ओळख निर्माण केली आहे. त्यांच्या उल्लेखनीय कार्याची दखल घेत जिल्हा प्रशासनाने त्यांना ‘आदर्श तहसीलदार’ पुरस्काराने गौरविले.
या सन्मानानंतर पंचायत समिती, हिमायतनगर येथे अधिकारी व कर्मचाऱ्यांच्या वतीने तहसीलदार सौ.पल्लवी टेमकर यांचा विशेष सत्कार करण्यात आला. गटविकास अधिकारी पांडुरंग नारवटकर यांनी पुष्पगुच्छ देऊन त्यांचे अभिनंदन केले. यावेळी मंडळ अधिकारी एम. बी. चव्हाण, अभियंता विशाल पवार, ग्रामपंचायत अधिकारी नारायण काळे, ग्रामसेवक सटलावार, ग्रामसेवक भोगे, नरेगा विभागाचे अभियंता भिसे, कोंडलवार, बांधकाम विभागाचे कदम, जामकर, पांचाळ, अद्वैत देशपांडे, देवसरकर, सरपंच मारोती वाडेकर, पत्रकार सोपान बोंपीलवार, दत्ता पुपलवाड यांच्यासह पंचायत समितीचे अधिकारी व कर्मचारी मोठ्या संख्येने उपस्थित होते.
उपस्थित मान्यवरांनी तहसीलदार पल्लवी टेमकर यांच्या कर्तव्यदक्ष, पारदर्शक आणि जनहिताच्या कार्यपद्धतीचे कौतुक करत, भविष्यातही त्यांच्या नेतृत्वाखाली प्रशासन अधिक प्रभावीपणे जनतेची सेवा करेल, असा विश्वास व्यक्त केला. ‘आदर्श तहसीलदार’ हा सन्मान केवळ वैयक्तिक यश नसून संपूर्ण हिमायतनगर तालुक्यासाठी अभिमानाची बाब असल्याची भावना यावेळी व्यक्त करण्यात आली.
