नगराध्यक्ष शरद पवार व टीम कठोर निर्णयाच्या भूमिकेत
शहरातील वाहतुकीला शिस्त लावा
पार्किंग व्यवस्था मार्गी लावा
नागरिकांची कामे वेळेत पूर्ण करा
लोहा | लोहा शहरात बॅनर लावण्यासंदर्भात उच्च न्यायालयाच्या निर्देशांचे सर्रास उल्लंघन होत असल्याने आमदार प्रतापराव पाटील चिखलीकर यांनी याची गंभीर दखल घेत नगरपालिकेला थेट एक्शन मोडवर आणले आहे. शहरातील कोणत्याही दुकानासमोर किंवा प्रतिष्ठानासमोर बॅनर लावू नयेत, बॅनरसाठी स्वतंत्र जागा निश्चित करावी व नियमांची काटेकोर अंमलबजावणी करावी, अशा सक्त सूचना त्यांनी मुख्याधिकाऱ्यांना दिल्या आहेत.
मागील काही वर्षांपूर्वी शहरात बॅनर व होल्डिंगसाठी स्वतंत्र जागा निश्चित करण्याचा निर्णय कागदावर झाला होता. मात्र नगरपालिकेकडून त्याची प्रभावी अंमलबजावणी न झाल्याने शहराचे विद्रुपीकरण सुरूच राहिले. अनेक तक्रारी होऊनही प्रशासनाकडून ठोस कारवाई न झाल्याने नागरिक व व्यापारी वर्गात तीव्र नाराजी होती. बुधवारी (दि. ५ फेब्रुवारी) लोहा नगरपालिकेच्या नगराध्यक्ष माणिकराव पाटील सभागृहात आमदार प्रतापराव पाटील चिखलीकर यांच्या प्रमुख उपस्थितीत नगरपालिकेच्या अडचणी, विकासकामे व शहरातील नागरी समस्यांबाबत आढावा बैठक घेण्यात आली.
या बैठकीस नगराध्यक्ष शरद पवार, उपनगराध्यक्ष करीम शेख, माजी उपनगराध्यक्ष केशवराव मुकदम, पोलीस निरीक्षक नागनाथ आयलाने, मुख्याधिकारी श्रीकांत लाळगे, वीज विभागाचे उपकार्यकारी अभियंता सुतार, बांधकाम विभागाचे उपअभियंता नरमिटवार, अभियंता सोमवंशी, लिंबोटी धरणाचे उपअभियंता कमठाणे, नगरसेवक, गटनेते भास्कर पवार, अविनाश पवार, सतीश निखाते, केतन खिलारे, सदा तेलंग, मारुती जंगले, पंकज परिहार, तुकाराम दाढेल, गणेश बगाडे, विलास कहालेकर, इरबाजी पवार, श्रीकांत मंजलवाड, बी.डी. जाधव, नगर अभियंता शरद राहेरकर, कार्यालयीन अधीक्षक पुजारी, स्वच्छता विभागाचे अधिकारी जितेंद्र ठेवरे, लता ढवळे, लेखापाल अजिंक्य केंद्रे यांच्यासह अधिकारी व कर्मचारी उपस्थित होते.
यावेळी आमदार प्रतापराव पाटील यांनी सर्व विभागांचा सविस्तर आढावा घेतला. जुन्या शहरात जाणाऱ्या रस्त्यावरील अतिक्रमणे तात्काळ हटवावीत, अशी मागणी उपस्थितांनी केली. स्वच्छतेबाबत समाधान व्यक्त करताना, शहरातील बॅनरप्रकरणी कोणत्याही परिस्थितीत दुकानदारांच्या तक्रारी येणार नाहीत याची दक्षता घ्यावी, अशी सक्त ताकीद त्यांनी मुख्याधिकाऱ्यांना दिली.
तसेच शहरातील वाढती वाहतूक कोंडी सोडवण्यासाठी रस्त्यावरील अतिक्रमणे हटवावीत, पार्किंगला शिस्त लावावी आणि पादचारी व ज्येष्ठ नागरिकांना त्रास होणार नाही याची काळजी घ्यावी. यासाठी पोलीस प्रशासन व नगरपालिकेने समन्वयाने काम करावे, असे स्पष्ट निर्देशही आमदारांनी दिले.
शहरातील दुकानदारांना मोठा दिलासा
शहरात वाट्टेल त्या ठिकाणी व कित्येक दिवस बॅनर लावण्याच्या पद्धतीमुळे लाखो रुपये भाडे देणारे दुकानदार गेल्या अनेक वर्षांपासून त्रस्त होते. मागील सत्ताकाळात मनमानी सुरू होती. मात्र नवनिर्वाचित नगराध्यक्ष शरद पवार, उपनगराध्यक्ष करीम शेख व नगरसेवकांनी बॅनरसाठी जागा निश्चित करण्याचा ठोस निर्णय घेतल्याने, मुख्याधिकाऱ्यांना त्याची अंमलबजावणी करण्याचे निर्देश देण्यात आले आहेत. त्यामुळे लवकरच शहरातील बॅनरमुळे होणारे विद्रुपीकरण थांबणार असून, व्यापारी वर्गाला मोठा दिलासा मिळणार आहे.
