नांदेड| नांदेड जिल्हा परिषदेच्या मुख्य कार्यकारी अधिकारी मीनल करनवाल यांच्या निर्णयामुळे अनुकंपाधारकांच्या कुटुंबीयांना दिलासा मिळाला आहे. आज मंगळवार दिनांक 13 ऑगस्ट रोजी अनुकंपाधारकांना नियुक्त्या देण्यात आल्या आहेत. ह्या नियुक्त्या, ज्येष्ठता आणि शैक्षणिक पात्रतेच्या आधारे देण्यात आल्याचे मुख्य कार्यकारी अधिकारी मीनल करनवाल यांनी सांगीतले आहे.
विविध पदांसाठी नियुक्त्यांचा यामध्ये समावेश आहे. यामध्ये कनिष्ठ अभियंता (स्थापत्य) पदावर 2 जण, स्थापत्य अभियांत्रिकी सहाय्यक म्हणून 1 जण, आरोग्य सेवक पदावर 3, पशुधन पर्यवेक्षक म्हणून 1, 6 कंत्राटी ग्रामसेवक आणि 49 परिचर या पदांवर नियुक्त्या देण्यात आल्या आहेत. या प्रक्रियेत ज्येष्ठतेनुसार योग्यतेची प्राथमिकता देऊन अनुकंपाधारकांच्या हक्कांचा सन्मान करण्यात आला आहे. भविष्यात परिचर पदाच्या फेर नियुक्त्या करताना वर्ग-3 पदावर नियुक्त्या देण्यात येतील.
या निर्णयामुळे नांदेड जिल्ह्यातील अनुकंपाधारकांच्या कुटुंबांना आर्थिक स्थैर्य मिळेल तसेच त्यांच्या जीवनात एक नवीन सुरुवात होईल. नियुक्त्या झालेल्या सर्व 62 जणांनी जिल्हा परिषदेच्या या पावलाचे स्वागत केले असून, यामुळे त्यांच्या भविष्यातील करियरला एक नवी दिशा मिळेल, अशी आशा व्यक्त केली आहे.
मुख्य कार्यकारी अधिकारी मीनल करनवाल यांच्या नेतृत्वाखाली तसेच सामान्य प्रशासन विभागाचे उप मुख्य कार्यकारी अधिकारी राजकुमार मुक्कावार यांच्या देखरेखाली या प्रक्रिया पूर्ण झाल्या आहेत. नवनियुक्त कर्मचा-यांनी मुख्य कार्यकारी अधिकारी मीनल करनवाल यांचा सत्कार करुन कृतज्ञता व्यक्त केली.