नांदेड| प्रादेशिक परिवहन कार्यालयाचे वायुवेग पथकामार्फत 1 ते 22 जुलै 2025 कालावधीत नियमितपणे शालेय विद्यार्थ्यांची वाहतूक करणाऱ्या ऑटोरिक्षांची मोटार वाहन कायद्यातील तरतूदी व प्रचलित शासन नियमानुसार तपासणी करण्यात आली आहे. या कारवाईत आसन क्षमतेपेक्षा जास्त शालेय विद्यार्थ्यांची वाहतुक करणाऱ्या एकूण 37 ऑटोरिक्षा चालकांवर कारवाई करण्यात आली असून त्यांच्याकडून 2 लाख 20 हजार रुपयाचा दंड वसुल करण्यात आला आहे.
या तपासणी मोहिमेत शालेय विद्यार्थ्यांची अवैध वाहतुक करणाऱ्या ऑटोरिक्षाची वैध कागदपत्रे व ऑटोरिक्षाची तपासणी करण्यात येते. तपासणी दरम्यान वैध कागदपत्रे सादर न करणाऱ्या, शालेय विद्यार्थ्यांची अवैध वाहतुक करणाऱ्या, आसन क्षमतेपेक्षा जास्त विद्यार्थ्याची वाहतुक करणाऱ्या, वैधपरवाना नसलेल्या तसेच मोटार वाहन कायद्यातील तरतुदींचे पालन न करणाऱ्या, शालेय विद्यार्थ्याची रिक्षातून अवैध वाहतुक करणाऱ्या ऑटोरिक्षावर दंडात्मक तसेच मोटार वाहन कायदयातील तरतुदीप्रमाणे कारवाई करण्यात आली आहे.
तपासणी दरम्यान दंडात्मक व मोटार वाहन कायद्योतील तरतुदीनुसार कार्यवाही टाळण्यासाठी शालेय विद्यार्थ्यांची वाहतूक करणाऱ्या ऑटोरिक्षा चालकांनी शालेय विद्यार्थ्यांची अवैध वाहतुक करू नये. वाहनाची सर्व वैध कागदपत्रे सोबत बाळगावित व मोटार वाहन कायदयातील तरतुदीनूसार तपासणी दरम्यान मागणी केल्यास सादर करावीत. ऑटोरिक्षातून नियमानुसार शालेय विद्यार्थ्याची वाहतूक करावी. ऑटोरिक्षामधून आसन क्षमतेच्या दिडपट शालेय विद्यार्थ्याची वाहतूक करण्याबाबत परवानगी असल्याने त्यापेक्षा अधिक विद्यार्थ्यांची वाहतुक करताना आढळून आल्यास त्यांचे विरुध्द मोटार वाहन कायदयातील तरतुदीनुसार कारवाई करण्यात येईल. जिल्हयातील सर्व शालेय विद्यार्थ्यांची वाहतुक करणाऱ्या ऑटोरिक्षा संघटना, चालक, मालक यांनी याची नोंद घ्यावी, असे आवाहन प्रादेशिक परिवहन अधिकारी नांदेड यांनी केले आहे.
शालेय विद्यार्थ्यांची वाहतूक करणाऱ्या बसेसची तपासणी कारवाईत चालकांकडून 7 लाख 4 हजार रुपयाचा दंड वसूल
प्रादेशिक परिवहन कार्यालयाच्या वायुवेग पथकामार्फत 18 ते 30 जुन 2025 कालावधीत वायुवेग पथक शालेय विद्यार्थ्यांची वाहतुक करणाऱ्या स्कुल बसची मोटार वाहन कायद्यातील तरतूदी व प्रचलित शासन नियमानुसार तपासणी करण्यात आली आहे. या तपासणी मोहिमेत स्कुल बसची सर्व वैध कागदपत्रे व बसची तपासणी करण्यात येते. या कारवाईत 89 बसेवर कारवाई करण्यात आली असून 7 लाख 4 हजार रुपयाचा दंड आकारण्यात आला आहे.
या तपासणी दरम्यान वैध कागदपत्रे सादर न करणाऱ्या, विनापरवाना अथवा परवान्याच्या अटीचा भंग करणे, योग्यता प्रमाणपत्र नसणे, वाहनात बेकायदेशीर फेरबदल करणे, सीसीटीव्ही व ट्रकींग प्रणालीचा वापर न करणे, शालेय विद्यार्थ्यांची अवैध वाहतुक करणाऱ्या, आसन क्षमतेपेक्षा जास्त विद्यार्थ्याची वाहतुक करणाऱ्या, वैध स्कुलबस परवाना नसलेल्या तसेच मोटार वाहन कायद्यातील तरतुदींचे पालन न करणाऱ्या स्कुलबसेसवर दंडात्मक तसेच मोटार वाहन कायद्यातील तरतुदीप्रमाणे कारवाई करण्यात आली आहे.
जिल्ह्यातील सर्व संघटना, स्कुलबस चालक-मालक यांनी स्कुलबस तपासणी दरम्यान दंडात्मक व मोटार वाहन कायद्यातील तरतुदीनुसार कार्यवाही टाळावी. यासाठी शालेय विद्यार्थ्यांची अवैध वाहतुक करू नये. वाहनाची सर्व वैध कागदपत्रे सोबत ठेवावीत. मोटार वाहन कायद्यातील तरतुदीनूसार तपासणी दरम्यान मागणी केल्यास वैध कागदपत्रे सादर करावीत. शालेय विद्यार्थ्याची वाहतूक नियमानुसार करावी. वाहन अटकाव व दंडात्मक कारवाई टाळावी, असे आवाहन प्रादेशिक परिवहन अधिकारी नांदेड यांनी केले आहे.
