हिमायतनगर, अनिल मादसवार | विदर्भ आणि मराठवाड्याच्या वरच्या भागात झालेल्या दमदार पावसामुळे पैनगंगा नदी दुथडी भरून वाहू लागली असून, तिच्यावर अवलंबून असलेला निसर्गाचा अद्भुत आविष्कार सहस्त्रकुंड धबधबा आता पूर्ण क्षमतेने कोसळत आहे. उंच कड्यावरून फेसाळत कोसळणाऱ्या शुभ्र धारा आणि सभोवतालची गर्द हिरवाई पाहण्यासाठी पर्यटकांची मोठी गर्दी उसळत आहे.
गेल्या तीन-चार दिवसांपासून सुरू असलेल्या पावसाने संपूर्ण परिसर हिरवाईने नटला आहे. काळे ढग, रिमझिम सरी, धुक्याची चादर आणि कडेकपाऱ्यांतून कोसळणारा दुधाळ धबधबा असा मनमोहक नजारा पर्यटकांना अक्षरशः भुरळ घालत आहे. निसर्गप्रेमी, छायाचित्रकार आणि पर्यटनप्रेमींसाठी सहस्त्रकुंड पुन्हा एकदा आकर्षणाचे प्रमुख केंद्र बनले आहे.
सुट्टीचा दिवस आणि पावसाळी वातावरण यामुळे हिमायतनगर, उमरखेड, नांदेड, यवतमाळ तसेच मराठवाडा-विदर्भातील विविध भागांतून पर्यटक मोठ्या संख्येने सहस्त्रकुंडकडे धाव घेत आहेत. धबधब्याच्या गर्जनेसह वाहणाऱ्या पैनगंगेचा प्रवाह प्रत्येकाच्या मनात रोमांच निर्माण करत आहे.
मात्र, धबधब्याचा प्रवाह सध्या अत्यंत वेगवान असल्याने पर्यटकांनी सेल्फीच्या मोहापायी धोकादायक ठिकाणी जाणे टाळावे, नदीपात्रात उतरू नये आणि प्रशासनाच्या सूचनांचे काटेकोर पालन करावे, असे आवाहन करण्यात आले आहे. यंदाच्या पावसाने सहस्त्रकुंडला पुन्हा एकदा नवसंजीवनी दिली असून, निसर्गाच्या रौद्र आणि रम्य रूपाचा अद्वितीय संगम अनुभवण्यासाठी सहस्त्रकुंड पर्यटकांना खुणावत आहे.
