हिमायतनगर (अनिल मादसवार) हिमायतनगर शहर व ग्रामीण भागातील महावितरणच्या मनमानी, बेजबाबदार व धोकादायक कारभाराविरोधात ३ फेब्रुवारीपासून सुरू असलेले अर्धनग्न आंदोलन आता ४ फेब्रुवारी २०२६ रोजी सायंकाळी पाच वाजल्यापासून बेमुदत आमरण उपोषणात रूपांतरित करण्यात आले आहे. या आंदोलनामुळे शहरात मोठी खळबळ उडाली आहे. एकूणच खडकाच्या थंडीतही आंदोलनची चर्चा शहरात गरम होते आहे.
राष्ट्रवादी काँग्रेस (अजित पवार गट) चे तालुकाध्यक्ष वामनराव गंगाबाई लक्ष्मणराव मिराशे पाटील यांच्या नेतृत्वाखाली हे आंदोलन सुरू असून, महावितरणच्या विविध गंभीर गैरप्रकारांवर तातडीने कारवाई करण्याची मागणी करण्यात आली आहे. त्यांनी केलेल्या मागण्या पुढील प्रमाणे असून,शहर व ग्रामीण भागात विनापरवानगी बसवलेले डीपी तात्काळ काढून उपविभाग कार्यालयात जमा करावेत, शहरातील स्थलांतरित ३३ केव्ही लाईनच्या विनापरवाना कामाची खातेनिहाय चौकशी करावी.
रस्त्यावरून जाणाऱ्या ३३ केव्ही लाईनमुळे अपघाताचा धोका असल्याने ती तात्काळ हटवावी, वाढीव व चुकीची वीजबिले देऊन ग्राहकांची फसवणूक थांबवावी व दोषी कर्मचाऱ्यांवर कारवाई करावी, पेट्रोलपंप, वेअरहाऊस व मोठ्या बांधकामाजवळील विनापरवाना लाईन शिफ्टिंगची चौकशी करा, मद्यप्राशन करून ड्युटी करणाऱ्या लाईनमन व कर्मचाऱ्यांवर कठोर कारवाई करा.
लोकडोबा चौक, हिंदू स्मशानभूमी रोड व श्री परमेश्वर मंदिर कमानीसमोरील धोकादायक डीपी तात्काळ हटवावेत, शहरातील सर्व डीपी, केबल, किटकॅट बॉक्स यांचे मेंटेनन्स तातडीने करावे, वारंवार होणारी वीज खंडित थांबवावी, ग्रामीण भागातील शेतकऱ्यांना मंजुरीनुसार मोफत डीपी कामे तात्काळ पूर्ण करावीत आदी मागण्यांचा समावेश आहे.
वरील सर्व मागण्यांवर महावितरणने तातडीने कार्यवाही करून लेखी उत्तर द्यावे, अशी स्पष्ट मागणी आंदोलनकर्त्यांनी केली आहे. अन्यथा आंदोलन अधिक तीव्र करण्याचा इशारा देण्यात आला आहे. वामनराव पाटील यांनी केलेल्या आंदोलनाला शहर व ग्रामीण भागातील शेतकरी नागरिक ग्राहकांचा मोठा पाठिंबा मिळत असून त्यांनी उभारलेल्या आंदोलनाचे सोशल मीडियावरून अभिनंदन व कौतुक केले जात आहे. या निवेदनाच्या प्रती ऊर्जामंत्री, ऊर्जा राज्यमंत्री, महावितरण संचालक, मुख्य अभियंता, अधीक्षक अभियंता व कार्यकारी अभियंता यांना पाठविण्यात आल्या आहेत.
महावितरण प्रशासन आता या आमरण उपोषणाची दखल घेते का, की आंदोलन अधिक तीव्र होते, याकडे संपूर्ण हिमायतनगर तालुक्याचे लक्ष लागले आहे.