नांदेड| ‘माती वाचवा, पाणी वाचवा, सुरक्षित भविष्य घडवा’, ‘जल है तो कल है’, ‘आजचे पाणी संवर्धन, उद्याचे सुरक्षित भविष्य’ आणि ‘पाणी आडवा, पाणी जिरवा’ अशा जलसंवर्धनाच्या संदेशांनी शुक्रवारी नांदेड शहर दुमदुमले. महाराष्ट्राचे माजी मुख्यमंत्री व जलक्रांतीचे प्रणेते स्वर्गीय सुधाकररावजी नाईक यांच्या जयंतीनिमित्त मृदा व जलसंधारण विभागाच्या वतीने जलसंधारण दिन आणि महावॉकेथॉन ‘वॉक फॉर वॉटर’चे आयोजन करण्यात आले.
शासकीय तंत्रनिकेतन मैदान येथे आयोजित या उपक्रमात आमदार जयाताई चव्हाण, महापौर कविता मुळे, कुलगुरू मनोहर चासकर, जिल्हाधिकारी राहुल कर्डिले, मुख्य कार्यकारी अधिकारी महेश पाटील, जिल्हा पोलीस अधीक्षक डॉ. नीलाभ रोहन, मनपा आयुक्त महेशकुमार डोईफोडे, मृदा व जलसंधारण अधीक्षक अभियंता अजित परांडे, जिल्हा नियोजन अधिकारी सुधाकर चिंचाने, जिल्हा क्रीडा अधिकारी भैरवनाथ नाईकवाडी, जलसंपदा विभागाचे कार्यकारी अभियंता श्री. देशमुख यांच्यासह विविध विभागांचे अधिकारी उपस्थित होते.
विद्यार्थ्यांचा मोठा सहभाग – महावॉकेथॉनमध्ये नांदेड शहरातील यशवंत महाविद्यालय, महात्मा फुले हायस्कूल बाबानगर, राजर्षी शाहू महाराज हायस्कूल वसंतनगर, केंब्रिज हायस्कूल, शिवाजी हायस्कूल, पीपल्स हायस्कूल, के.आर.एम. महाविद्यालय, सम्राट अशोक हायस्कूल, एनएसबी कॉलेज, गुजराती हायस्कूल आदी शैक्षणिक संस्थांमधील विद्यार्थी मोठ्या संख्येने सहभागी झाले. शासकीय तंत्रनिकेतन महाविद्यालय परिसरात मृदा व जलसंधारण विभागामार्फत राबविण्यात येणाऱ्या विविध कामांची चित्रप्रदर्शनीही भरविण्यात आली होती. यावेळी जलसंधारणाचे महत्त्व आणि पाणी बचतीचा संदेश देण्यात आला.
3 किलोमीटर महावॉकेथॉन – शासकीय तंत्रनिकेतन मैदानापासून महावॉकेथॉनला सुरुवात झाली. व्हीआयपी रोड, महात्मा फुले चौक, डॉ. शंकरराव चव्हाण मेमोरियल मार्गे पुन्हा शासकीय तंत्रनिकेतन मैदान असा सुमारे तीन किलोमीटरचा मार्ग या महावॉकेथॉनसाठी निश्चित करण्यात आला होता. उपस्थित मान्यवरांनी हिरवा झेंडा दाखवून महावॉकेथॉनला सुरुवात केली आणि स्वतःही सहभाग नोंदविला. महावॉकेथॉनमध्ये सहभागी झालेल्या नागरिक व विद्यार्थ्यांनी ‘पाणी आडवा, पाणी जिरवा’ची शपथ घेत जलसंवर्धनाचा संदेश दिला. सहभागींची ईश्वरचिठ्ठी काढून विजेत्यांना मान्यवरांच्या हस्ते पारितोषिकांचे वितरण करण्यात आले.
