हदगांव| हदगांव तालुक्यातील हरडफ येथे त्यागमूर्ती माता रमाई यांची जयंती मोठ्या उत्साहात आणि श्रद्धाभावाने साजरी करण्यात आली. या जयंतीनिमित्त धम्म कीर्ती महिला मंडळाच्या वतीने मागील दहा दिवसांपासून जय्यत तयारी करण्यात आली होती.
कार्यक्रमाची सुरुवात सकाळी माता रमाई यांच्या प्रतिमेस हार अर्पण करून करण्यात आली. त्यानंतर माता रमाई यांच्या जीवनावर आधारित गीतांवर महिलांनी सादर केलेल्या लेझीम नृत्याने संपूर्ण परिसर दुमदुमून गेला. उत्कृष्ट तालबद्ध सादरीकरणामुळे उपस्थितांनी टाळ्यांचा कडकडाट करत कलाकारांचे भरभरून कौतुक केले.
कार्यक्रमात तथागत भगवान गौतम बुद्ध, डॉ. बाबासाहेब आंबेडकर व माता रमाई यांच्या जीवनकार्यावर आधारित भाषणे, गाणी व नृत्यप्रकार सादर करण्यात आले. लहान बालकांनी केलेल्या सादरीकरणाने उपस्थितांची मने जिंकली. “नांदन नांदन होतं रमाचं नांदण” हे गीत वारंवार सादर करण्यात आले, तर “रमाबाईचा जन्म झाला, वाटा साखर-पान” या गाण्यावर सादर झालेल्या लेझीम नृत्यामुळे कार्यक्रमात विशेष रंगत आली.
संविधान वाठोरे व त्यांच्या संचाने “मी फक्त भीमाला मानतो” या गीतावर सादरीकरण करत उपस्थितांना मंत्रमुग्ध केले. या उत्कृष्ट लेझीम नृत्यास सुवर्णमाला वाठोरे व मंगल वाठोरे यांचे मार्गदर्शन लाभले. या कार्यक्रमात शिल्पा वाठोरे, सुनीता वाठोरे, प्रतीक्षा वायवळ, स्नेहा वाठोरे, मंगल आर. व्ही. वाठोरे, समीक्षा नरवाडे, उषा नरवाडे, पोर्णिमा नरवाडे, पूजा वाठोरे, सपना नरवाडे, स्वाती वाठोरे, आरुषी वाठोरे, दिव्या वाठोरे, शीतल वाठोरे, संजीवनी रणवीर आदी महिलांनी लेझीम नृत्य सादर करून माता रमाई जयंती उत्साहात साजरी केली.
जयंतीनिमित्त कपिल वायवळ, संदीप रायघोळ, सिद्धार्थ वाठोरे, अमोल वाठोरे यांच्या वतीने जमा झालेल्या निधीतून भोजनदानाचा उपक्रम राबविण्यात आला.
कार्यक्रमाचे प्रभावी सूत्रसंचालन आकांक्षा वायवळ यांनी केले, तर आभार प्रदर्शन ज्योती लोणे यांनी मानले.
