कंधार, सचिन मोरे| यंदाच्या खरीप हंगामात पावसाने मोठी ओढ दिल्याने शेतकऱ्यांसमोर संकट उभे राहिले आहे. पावसाअभावी पिकांच्या वाढीवर परिणाम होऊन उत्पादनात मोठी घट होण्याची शक्यता निर्माण झाली आहे. या पार्श्वभूमीवर शासनाने दुष्काळ जाहीर केला असून, कंधार तालुक्यात महसूल प्रशासनाकडून दुष्काळी परिस्थितीचा आढावा घेण्यासाठी पीक पाहणीची मोहीम सुरू करण्यात आली आहे.
याच अनुषंगाने मंगळवार, ६ ऑक्टोबर रोजी कोटबाजार शिवारातील विविध पिकांची प्रत्यक्ष पाहणी करण्यात आली. महसूल व कृषी विभागाच्या अधिकारी-कर्मचाऱ्यांनी शेतशिवारात जाऊन पिकांची स्थिती बारकाईने पाहिली. पावसाचे प्रमाण, पिकांची वाढ, जमिनीतील ओलावा तसेच पावसाअभावी पिकांवर झालेला परिणाम याबाबत प्रत्यक्ष पाहणी करून परिस्थितीचा आढावा घेण्यात आला.
पावसाअभावी खरीप पिकांना फटका
कंधार तालुक्यात यंदा समाधानकारक पाऊस न झाल्याने खरीप पिकांना मोठा फटका बसला आहे. सुरुवातीला झालेल्या पावसानंतर शेतकऱ्यांनी पेरणी केली; मात्र त्यानंतर पावसाने दीर्घकाळ दडी मारल्याने अनेक ठिकाणी पिकांची वाढ अपेक्षित प्रमाणात झालेली नाही. काही भागांत पिके कोमेजण्याची स्थिती निर्माण झाली असून, शेतकऱ्यांच्या उत्पादनावर त्याचा थेट परिणाम होण्याची शक्यता आहे. दुष्काळ जाहीर झाल्यानंतर प्रशासनाकडून करण्यात येत असलेल्या या पीक पाहणीला विशेष महत्त्व प्राप्त झाले आहे. शेतकऱ्यांच्या प्रत्यक्ष शेतात जाऊन पिकांची स्थिती जाणून घेऊन नुकसानीचे वस्तुनिष्ठ मूल्यमापन करावे, अशी अपेक्षा शेतकरी वर्गातून व्यक्त होत आहे.
अधिकाऱ्यांकडून प्रत्यक्ष शेतशिवाराची पाहणी
कोटबाजार येथे झालेल्या पाहणीदरम्यान महसूल व कृषी विभागाच्या अधिकाऱ्यांनी शेतकऱ्यांशी संवाद साधून पिकांच्या सद्यस्थितीची माहिती घेतली. दुष्काळामुळे शेतीवर निर्माण झालेल्या अडचणी, पिकांचे नुकसान आणि अपेक्षित उत्पादन याबाबतही माहिती घेण्यात आली. प्रशासनाच्या पाहणीमुळे दुष्काळग्रस्त शेतकऱ्यांना शासनाच्या मदतीचा लाभ मिळण्याचा मार्ग सुकर होईल, अशी अपेक्षा व्यक्त केली जात आहे.
यावेळी तलाठी परशुराम जाधव, सहाय्यक कृषी मंडळ अधिकारी अनुसया केंद्रे, ग्रामसेवक अमृत मंगनाळे, सरपंच मोहम्मद अजीमोद्दीन, पोलीसपाटील प्रतिनिधी मिर्झा यादुल बेग, शेख इमरोज, मोहम्मद नसीरोद्दीन, मिर्झा सैफ बेग, सत्तार बेग यांच्यासह शेतकरी,ग्रामस्थ उपस्थित होते.
कंधार तालुक्यातील दुष्काळी परिस्थिती लक्षात घेता प्रशासनाकडून सुरू असलेली पीक पाहणी, नुकसानीची नोंद आणि वस्तुनिष्ठ अहवालाची प्रक्रिया शेतकऱ्यांसाठी महत्त्वाची ठरणार आहे. शासनाच्या निकषानुसार पात्र शेतकऱ्यांना दुष्काळी मदत, सवलती आणि इतर योजनांचा लाभ मिळावा, अशी अपेक्षा शेतकरी वर्गातून व्यक्त होत आहे.
