नांदेड, अनिल मादसवार| जिल्हा परिषदेच्या कामात सुसूत्रता यावी तसेच कारभार अधिक पारदर्शक होण्यासाठी विकसित करण्यात आलेल्या जिल्हा परिषद मॉनिटरिंग सिस्टीम ॲपचे विमोचन नुकतेच राज्याचे माजी मुख्यमंत्री तथा खासदार अशोकराव चव्हाण यांच्या हस्ते करण्यात आले. या वेळी आमदार श्रीजया चव्हाण, मुख्य कार्यकारी अधिकारी मीनल करनवाल, अतिरिक्त मुख्य कार्यकारी अधिकारी संदीप माळोदे, जिल्हा ग्रामीण विकास यंत्रणेचे प्रकल्प संचालक डॉ. संजय तुबाकले, सामान्य प्रशासन विभागाचे उपमुख्य कार्यकारी अधिकारी राजकुमार मुक्कावार तसेच सर्व विभाग प्रमुख उपस्थित होते.
जिल्हा परिषदेच्या अधिकारी व कर्मचाऱ्यांसाठी तयार करण्यात आलेले हे विशेष ॲप माहिती संकलन तसेच आढावा घेण्यासाठी उपयुक्त ठरणार आहे. यामुळे जिल्हा परिषदेचे कामकाज अधिक पारदर्शक होईल, असे मत खासदार अशोकराव चव्हाण यांनी यावेळी व्यक्त केले. या ॲपमध्ये जिल्हा परिषद अंतर्गत असलेल्या सर्व आस्थापनांमधील विभागनिहाय भरलेली व रिक्त पदांची माहिती संकलित करण्यात आली आहे. बदली प्रक्रियेदरम्यान पदस्थापनेचा समतोल राखण्यासाठी हे ॲप उपयोगी ठरणार आहे.
याशिवाय ग्रामपंचायत अधिकारी, शिक्षक व आरोग्य कर्मचारी यांची उपस्थिती क्युआर कोडद्वारे नोंदवलेली उपस्थितीची माहिती कळणार आहे. शिक्षण विभागाच्या माध्यमातून शाळा निहाय मुलांच्या भाषा व गणित विषयातील गुणवत्ता स्तराची माहिती सहज मिळणार आहे. मुख्य कार्यकारी अधिकारी यांच्या संकल्पनेतून नागरिकांच्या तक्रारींचे निराकरण करण्यासाठी राबविण्यात येणाऱ्या व्हिआर टाईम बाॅण्ड प्रणालीची माहितीही या ॲपमध्ये समाविष्ट करण्यात आली आहे. बांधकाम विभागातील सर्व प्रगतीपथावरील प्रकल्पांच्या टप्प्यांची माहिती या प्रणालीद्वारे मिळणार आहे. तसेच जिल्हा परिषद, पंचायत समिती व ग्रामपंचायत स्तरावर 15 व्या वित्त आयोगाच्या निधीतून झालेल्या विकास कामांचा आढावा घेता येणार आहे. निधीचा खर्च व शिल्लक रक्कम याबाबतही स्पष्टता राहणार आहे.
यासोबतच जिल्हा परिषदेच्या विविध विभागांमधील संचिका प्रवासाचे सुलभ व्यवस्थापन करण्यासाठी फाईल ट्रॅकिंग सिस्टीम विकसित करण्यात आली आहे. या नव्याने सुरू केलेल्या मॉनिटरिंग सिस्टीममुळे जिल्हा परिषदेचा कारभार अधिक पारदर्शक व प्रभावी होईल असा विश्वास व्यक्त करण्यात आला.