वडगांव/पोटा| जिल्हा परिषद केंद्रीय प्राथमिक शाळा पोटा बु. शाळेची इमारत आता वादाच्या भोवऱ्यात सापडली आहे. सन १९६२ ला स्थापना झालेल्या शाळेच्या सहा खोल्या बांधकाम पूर्ण झाले असले तरी ती शाळा एक ते आठ वर्गाची आहे. आता शाळेसाठी मंजूर निधीतून होऊ लागलेल्या कामास शेजारील शेतकऱ्याने शाळेची जागा आमच्या मालकीची असल्याचे सांगत अडथळा निर्माण केल्याने नेमकी ही जागा कोणाच्या नावे आहे…? असा प्रश्न पुढे आला आहे.
जिल्हा परिषद केंद्रीय प्राथमिक शाळा पोटा बु. येथील शाळा राष्ट्रीय महामार्गावर आहे. या शाळेत कार्यरत पदे सहा तर मान्यता पदे आठ आहेत. शाळेच्या भौगोलिक विकासासाठी गाव नमुना नंबर आठ अ. ला नोंद नसल्याची संबंधित शेतकऱ्याकडून कांगावा करून ही जागा माझ्या मालकी हक्काची असल्याचे सांगत विकास कामाला खोडा घातल्या जात आहे. नव्याने शाळेला बांधकाम करण्यासाठी शाळा खोली व किचन रूम, शौचालय मंजूर होवून बांधकामाचा भूमिपूजन आमदार बाबुराव कदम कोहळीकर यांनी केलं. मात्र या बांधकामाला शेजारील शेतकऱ्याकडून अडथळा निर्माण होत आहे. त्यामुळे बांधकाम रखडल्याने विद्यार्थ्यांचे शैक्षणिक नुकसान होत आहे.
सन २०२३ मध्ये जिल्हा परिषद शाळेच्या भौगोलिक परिस्थितीचे निरीक्षण करण्यासाठी शाळा निरीक्षण समिती अध्यक्ष, जिल्हा न्यायाधीश एक नांदेड व अतिरिक्त सत्र न्यायधीश नांदेड श. ए. बांगर यांनी सर्वे करून भौगोलिक सुविधेच्या अभावाबद्दल व गाव नमुना आठ बाबत संबंधित समितीचे सदस्य सचिव प्रशांत दिग्रसकर तथा शिक्षणाधिकारी यांच्याकडे तातडीने अहवाल देण्यात यावा अशा सूचना संबंधित शाळा व्यवस्थापन समिती ग्रामविकास अधिकारी यांना केल्या होत्या. तेव्हा शाळा कामांमध्ये अडथळा निर्माण होणार नाही, असे लेखी पत्र लिहून दिल्याचे सांगण्यात येते आहे . त्यानंतर कसलाही अडथळा नव्हता आता मात्र पुन्हा बांधकामासाठी अडथळा निर्माण झाला आहे.
शाळेसाठी शेतकऱ्यांच्या पुर्वजांनी दिली होती जागा
पूर्वी शाळेसाठी संबंधित शेतकऱ्यांच्या पुर्वजांनी ही जागा दिली होती, परंतु बदलत्या काळात आता राष्ट्रीय महामार्ग लगत असलेल्या शाळेची इमारत ही आमचीच असल्याचे सांगत संबंधीतांकडून हक्क गाजवीला जात आहे. याबाबत ग्रामविकास अधिकारी यांच्याशी चर्चा केली असता जिल्हा परिषद केंद्रीय प्राथमिक शाळा ही गाव नमुना नंबर आठला नोंद असून, नोंदीप्रमाणेच आतापर्यंत त्या ठिकाणी सहा खोल्यांचे बांधकाम करण्यात आले आहे. आता नव्याने मंजूर झालेल्या खुल्या किचन रूम, शौचालय बांधकामासाठी शेतकरी जाणीवपूर्वक अडथळा निर्माण करीत असल्याचे त्यांनी पत्रकारांशी बोलताना सांगितले.
