नांदेड l आपल्या भारत देशाला इंग्रजांच्या दिडशे वर्षाच्या गुलामगिरीतून मुक्त करण्यासाठी हजारो देशभक्त महापुरुषांसह नागरिकांनी स्वातंत्र्य लढ्यात आपल्या प्राणाचे बलिदान दिले. त्यामुळे आपल्याला मिळालेल्या स्वातंत्र्य दिनाचे औचित्य साधून सातत्याने रक्तदान शिबीराचे आयोजन करणे, हे छत्रपती शिवाजी महाराज मुस्लिम सेवा संघासह अन्य सेवाभावी संस्थांचे समाजोपोगी कार्य खरोखरच कौतुकास्पद आणि अनुकरणीय आहे, असे गौरवोद्गार नांदेड परिक्षेत्राचे पोलीस उप महानिरीक्षक शहाजी उमाप यांनी काढले आहेत.
भारतीय स्वातंत्र्य दिनानिमित्त मस्जिद – ए – युनुस बाबूसेठ फॅमिली आणि फ्रेंड्स, छत्रपती शिवाजी महाराज मुस्लिम सेवा संघ आणि हॅपी क्लब यांच्या संयुक्त विद्यमाने सामाजिक बांधिलकी जोपासत तसेच स्वातंत्र्य लढ्यातील हुतात्म्यांच्या शौर्याविषयी कृतज्ञता व्यक्त करण्यासाठी सन २०१९ पासून दरवर्षी प्रमाणे याहीवर्षी रेल्वे स्टेशन परिसरात शुक्रवार दि.१५ ऑगस्ट २०२५ रोजी दिवसभर आयोजित करण्यात आलेल्या रक्तदान शिबिर प्रसंगी प्रमुख अतिथी म्हणून मार्गदर्शन करताना ते बोलत.
या शिबीर प्रसंगी प्रमुख पाहुणे म्हणून बौद्ध भंतेजी पय्याबोधी थेरो, मुस्लिम धर्मगुरू मौलाना साद अब्दुल साहब,हिंदु धर्मगुरू बाळगीर पंचगीर महाराज,ख्रिश्चन धर्मगुरु फादर प्रशांत चादोरीकर, गुरुद्वारा बोर्डाचे माजी अध्यक्ष रणजितसिंह चिरागिया, मराठा सेवा संघाचे अध्यक्ष कामाची पवार, निवासी उपजिल्हाधिकारी किरण अंबेकर, मनपा आयुक्त डॉ. महेशकुमार डोईफोडे, अधिष्ठाता डॉ. सुधीर देशमुख,आदि मान्यवर उपस्थित होते.
प्रारंभी छत्रपती शिवाजी महाराज मुस्लिम सेवा संघाचे अध्यक्ष आयुबखान पठाण, उपाध्यक्ष कासिम वाशिम बाबुशेठ, हॅपी क्लब फाउंडेशन चे अध्यक्ष मोहम्मद शोहेब यांनी यावेळी उपस्थित सर्व मान्यवरांचे पुष्पगुच्छ देऊन स्वागत केले. त्यानंतर दिवसभर सुरू असलेल्या या शिबिराला राष्ट्रप्रेमी नागरिकांनी उत्स्फूर्त प्रतिसाद देत स्वंयस्फूर्तपणे रक्तदान केले.त्यामुळे विष्णुपुरी येथील शासकीय रुग्णालयातील आरोग्य कर्मचाऱ्यांच्या टीमने यावेळी ७९ बाटल्या रक्त संकलित केले. तसेच अनेक सामाजिक संघटनाच्या पदाधिकारी आणि कार्यकर्त्यांनी या रक्तदान शिबिरास प्रत्यक्ष भेट देऊन शुभेच्छा दिल्या.
धर्म, जाती भेद विरहित स्तुत्य उपक्रम भंते पय्याबोधी,भारतीय स्वातंत्र्य दिनानिमित्त मस्जिद – ए – युनुस बाबूसेठ फॅमिली आणि फ्रेंड्स, छत्रपती शिवाजी महाराज मुस्लिम सेवा संघ आणि हॅपी क्लब फाउंडेशन यांच्या संयुक्त विद्यमाने सामाजिक बांधिलकी जोपासत दरवर्षी प्रमाणे याहीवर्षी आयोजित करण्यात आलेला रक्तदान शिबीराचा उपक्रम हा सर्व धर्म, जाती भेद विरहित आणि अन्य सामाजिक संघटनांनी अनुकरण करावे असा स्तुत्य उपक्रम आहे,तसेच अशा समाजोपयोगी उपक्रमाची आपल्या देशात सद्द्याच्या काळाची गरज आहे.
असे प्रतिपादन बौद्ध भंते पय्याबोधी थेरो यांनी यावेळी केले,तसेच स्वातंत्र्य दिनाचे औचित्य साधून हा समाजोपयोगी उपक्रम सातत्याने राबविणाऱ्या छत्रपती शिवाजी महाराज मुस्लिम सेवा संघाचे अध्यक्ष आयुबखान पठाण, उपाध्यक्ष मोहम्मद कासिम वाशिम बाबु शेठ, हॅपी क्लब फाउंडेशनचे अध्यक्ष मोहम्मद शोहेब ॲड.मोहम्मद युनुस आवेस भाई मोहम्मद तहा मोहम्मद तला यांच्यासह त्यांच्या कार्यकर्त्यांचे कौतुक करत भंते पय्याबोधी थेरो यांनी त्यांना शुभेच्छा दिल्या आहेत.