हिमायतनगर, उत्कर्ष मादसवार| येथील ग्रामीण रुग्णालयात मंगळवारी (दि. १० मार्च २०२६) राज्यस्तरीय गुणवत्ता आश्वासन मापक (NQAS) कार्यक्रमांतर्गत समितीने भेट देत रुग्णालयातील विविध विभागांची सविस्तर पाहणी केली. या पाहणीदरम्यान रुग्णालयातील सेवा, स्वच्छता, व्यवस्थापन, दप्तर तपासणी तसेच तांत्रिक बाबींची पूर्तता यांची प्रत्यक्ष तपासणी करण्यात आली.
ही पाहणी जिल्हा शल्य चिकित्सक डॉ. संजय पेरके व निवासी वैद्यकीय अधिकारी डॉ. राजाभाऊ बुट्टे यांच्या मार्गदर्शनाखाली पार पडली. यावेळी नॅशनल अस्सेसर डॉ. अश्विनी वाघे (नागपूर) व डॉ. प्रियंका साबळे (कोल्हापूर) यांनी रुग्णालयातील विविध विभागांना भेट देत सखोल तपासणी केली आणि आवश्यक त्या मार्गदर्शक सूचना दिल्या.
या प्रसंगी वैद्यकीय अधीक्षक डॉ. विकास वानखेडे यांनी रुग्णालयाच्या कामकाजाची सविस्तर माहिती दिली, तर डॉ. शिवशंकर बुरकुले यांनी रुग्णालयातील सेवा व उपक्रमांचे पॉवर पॉईंट सादरीकरण केले. तसेच या प्रक्रियेत जिल्हा गुणवत्ता आश्वासन समन्वयक डॉ. गुडे, डॉ. लोखंडे, डॉ. तिवारी आणि डॉ. रुबी यांनी महत्त्वाची भूमिका बजावली.
या पाहणीसाठी रुग्णालयातील सर्व वैद्यकीय अधिकारी, दंत शल्य चिकित्सक, इन्चार्ज सिस्टर, अधीपरिचारिका, औषध निर्माण अधिकारी, प्राथमिक वैद्यकीय अधिकारी, क्ष-किरण तंत्रज्ञ, सहाय्यक अधीक्षक तसेच वर्ग-३ व वर्ग-४ कर्मचाऱ्यांनी परिश्रम घेतले. या तपासणीमुळे ग्रामीण रुग्णालयातील आरोग्य सेवांचा दर्जा अधिक उंचावण्यास मदत होणार असल्याचे वैद्यकीय अधिकाऱ्यांनी सांगितले.
“ग्रामीण रुग्णालयातील सर्व विभागांची सविस्तर पाहणी केल्यानंतर रुग्णसेवा, स्वच्छता, व्यवस्थापन आणि कागदपत्रांची पूर्तता समाधानकारक असल्याचे आढळले. राज्यस्तरीय गुणवत्ता आश्वासन प्रक्रियेसाठी रुग्णालयाने केलेली तयारी चांगली असून वैद्यकीय अधीक्षक डॉ. विकास वानखेडे तसेच सर्व वैद्यकीय अधिकारी व कर्मचारी यांचे कार्य समाधानकारक असल्याचे स्टेट असेसर यांनी नमूद केले.”