नांदेड| गणेशोत्सव काळात जिल्ह्यात कायदा व सुव्यवस्था अबाधित राहावी यासाठी नांदेड जिल्हा पोलीस दल सज्ज झाले आहे. जिल्हा पोलीस अधिक्षक मा. श्री. अबिनाश कुमार यांच्या मार्गदर्शनाखाली सर्व पोलीस ठाण्यांत शांतता कमिटीच्या बैठका घेऊन गणेश मंडळे व नागरिकांना शांततेचे आवाहन करण्यात आले आहे.
गणेशोत्सवात कोणताही अनुचित प्रकार घडू नये यासाठी शहरासह ग्रामीण भागात कडक पोलीस बंदोबस्त लावण्यात आला आहे. स्थानिक बंदोबस्तात 2 अपर पोलीस अधिक्षक, 6 उपविभागीय पोलीस अधिकारी, 39 पोलीस निरीक्षक, 206 उपनिरीक्षक, 3195 अंमलदार, 5 आरसीपी प्लाटून, 1 एसआरपीएफ कंपनी, 48 क्युआरटी अंमलदार तसेच 1300 पुरुष व 275 महिला होमगार्ड यांची नेमणूक करण्यात आली आहे.
याशिवाय बाहेरूनही अतिरिक्त बंदोबस्त मागविण्यात आला असून त्यात 2 पोलीस उपअधीक्षक, 6 पोलीस निरीक्षक, 1 एसआरपीएफ कंपनी, 50 महामार्ग पोलीस अंमलदार व 20 प्रशिक्षणार्थी उपनिरीक्षक यांचा समावेश आहे.
गणेशोत्सव सुरळीत पार पडावा म्हणून रूट मार्च, दंगा काबू सराव तसेच संयुक्त सुरक्षा मोहिमा राबविण्यात आल्या आहेत. जिल्हा पोलीस अधिक्षक अबिनाश कुमार यांनी नागरिकांना भयमुक्त व डीजेमुक्त गणेशोत्सव साजरा करण्याचे आवाहन केले आहे.
