हिमायतनगर, अनिल मादसवार| हिमायतनगर शहरात चोरट्यांनी डोके वर काढले असून, नागरिकांच्या सुरक्षिततेचा प्रश्न ऐरणीवर आला आहे. गोकुळ धाब्यावर चोरी करून चोरट्यांनी चक्क मटणावर ताव मारला, सामान अस्ताव्यस्त फेकून दिले, गल्ला तपासला आणि सीसीटीव्ही कॅमेऱ्यांचा डीव्हीआरही काढून नेला. दुसरीकडे, रेल्वे स्टेशन रोडवरील घरासमोर उभी असलेली दुचाकी चोरून नेण्यात आली. विशेष म्हणजे, दुचाकी चोरी करतानाचे सीसीटीव्ही फुटेज सोशल मीडियावर व्हायरल झाले आहे. डोक्याला पट्टी बांधून, परिसराची पाहणी करून आणि आजूबाजूला कोणी नसल्याची खात्री करत दुचाकी घेऊन जाण्याची पद्धत पाहता, चोरट्यांना कायद्याचा धाक आहे की नाही, असा रोकठोक सवाल उपस्थित होत आहे.
गोकुळ धाब्यावर चोरट्यांनी प्रवेश करून खाद्यपदार्थांवर ताव मारला. त्यानंतर धाब्यातील सामान अस्ताव्यस्त फेकून देत गल्लाही तपासला. मात्र, गल्ल्यात पैसे नसल्याने त्यांच्या हाती रोकड लागली नाही. एवढ्यावरच न थांबता त्यांनी सीसीटीव्हीचा डीव्हीआर काढून नेला. व्यावसायिक ठिकाणी घुसून अशा प्रकारे मनमानी करणे, सामानाची नासधूस करणे आणि निगराणी यंत्रणेचे उपकरणच घेऊन जाणे, हा प्रकार गंभीर आहे. चोरट्यांना चोरी करण्याइतका वेळ मिळतो, परिसराची पाहणी करता येते आणि सीसीटीव्हीचा डीव्हीआरही काढून नेता येतो, तर रात्रीच्या सुरक्षेची व्यवस्था नेमकी कुठे कमी पडते? हा प्रश्न आता उपस्थित होत आहे.
रेल्वे स्टेशन रोडवरील दुचाकी चोरीच्या घटनेतील सीसीटीव्ही फुटेज सोशल मीडियावर समोर आले आहे. या फुटेजमध्ये डोक्याला पट्टी बांधलेली एक व्यक्ती दुचाकीजवळ जाऊन पाहणी करताना दिसते. त्यानंतर परिसराचा अंदाज घेत, चप्पल काढून दुचाकी सुरू करून घेऊन जात असल्याचे दिसत आहे. याचवेळी आणखी एक व्यक्ती अंधारात उभा असल्याचेही फुटेजमध्ये दिसत असल्याचे सांगितले जात आहे.
या दृश्यांमुळे दुचाकी चोरीची घटना चर्चेचा विषय बनली आहे. संबंधित व्यक्तींची ओळख पटविणे, दुचाकी हस्तगत करणे आणि या प्रकरणात आणखी कोणाचा सहभाग आहे का, याचा शोध घेणे आवश्यक आहे. पोलिस या फुटेजच्या आधारे तपास करत असल्याची माहिती आहे. मात्र, तपासातून काय निष्पन्न झाले, याबाबत अधिकृत माहिती अद्याप समोर आलेली नाही.
पंधरा दिवसांपूर्वी तीन म्हशी चोरीला; आता धाबा आणि दुचाकीचे लक्ष्य! सुमारे पंधरा दिवसांपूर्वी हिमायतनगरच्या नदीकाठावरील परिसरात माने नामक शेतकऱ्याच्या शेतातून तीन म्हशी चोरीला गेल्याची घटना घडली होती. या प्रकरणाचा तपास सुरू असतानाच शहरात धाब्यावरील चोरी आणि दुचाकी लंपास करण्याच्या घटना समोर आल्या आहेत.
एकीकडे शेतकऱ्यांचे पशुधन सुरक्षित नाही, तर दुसरीकडे व्यावसायिक प्रतिष्ठाने आणि घरासमोर उभी असलेली वाहनेही चोरट्यांच्या निशाण्यावर येत आहेत. या घटनांचा एकमेकांशी संबंध आहे का, हे तपासातूनच स्पष्ट होईल. मात्र, सलग समोर येणाऱ्या चोरीच्या घटनांमुळे नागरिकांच्या मनात असुरक्षिततेची भावना निर्माण होणे स्वाभाविक आहे.
रोकठोक सवाल : नागरिकांनी रात्रभर पहारा द्यायचा का? चोरीच्या घटना घडल्यानंतर पंचनामा, पाहणी आणि तपास ही पोलिसांची आवश्यक प्रक्रिया आहेच; पण नागरिकांना अपेक्षा आहे ती चोरट्यांचा शोध घेऊन चोरीला गेलेला मुद्देमाल परत मिळवून देण्याची आणि अशा घटना पुन्हा घडू नयेत यासाठी प्रभावी प्रतिबंधात्मक उपाययोजना करण्याची.
धाब्यावरील चोरी आणि दुचाकी चोरीप्रकरणी पोलिसांत तक्रार देण्यात आली असून, पोलिसांनी घटनास्थळी भेट देऊन पाहणी केल्याचे सांगण्यात आले आहे. मात्र, संशयितांची ओळख पटली का? चोरीची दुचाकी कुठे आहे? तीन म्हशींच्या चोरीच्या तपासात काय प्रगती झाली? रात्रीच्या गस्तीमध्ये वाढ करण्यात आली आहे का? या प्रश्नांची उत्तरे नागरिकांना मिळणे गरजेचे आहे.
रात्रीची गस्त केवळ औपचारिकता ठरू नये. संवेदनशील भागांत नियमित गस्त, संशयास्पद हालचालींवर लक्ष, उपलब्ध सीसीटीव्ही फुटेजची तपासणी आणि चोरीच्या गुन्ह्यांचा वेगवान तपास या उपाययोजना प्रत्यक्षात दिसल्या पाहिजेत. नागरिकांच्या सुरक्षिततेची जबाबदारी केवळ नागरिकांवर ढकलून चालणार नाही. असेही काही जागरूक नागरिकांचे म्हणणे आहे.
दुष्काळात आर्थिक संकट; त्यात चोरीचा आणखी घाव! सध्याच्या दुष्काळी परिस्थितीत शेतकरी, व्यापारी आणि सर्वसामान्य नागरिक आधीच आर्थिक अडचणींना सामोरे जात आहेत. अशा वेळी पशुधन, दुचाकी किंवा व्यवसायातील साहित्य चोरीला जाणे म्हणजे त्यांच्या आर्थिक संकटात आणखी भर पडणे होय. त्यामुळे चोरीच्या घटनांकडे केवळ किरकोळ गुन्हे म्हणून पाहून चालणार नाही.
नागरिकांनीही घरांचे दरवाजे व्यवस्थित बंद ठेवावेत, दुचाकींना मजबूत लॉक लावावे, शक्यतो सुरक्षित ठिकाणी वाहने उभी करावीत आणि संशयास्पद हालचाल दिसल्यास तातडीने पोलिसांना कळवावे. मात्र, नागरिकांची सतर्कता ही पोलिसांच्या प्रभावी गस्तीला आणि तपासाला पर्याय ठरू शकत नाही.
हिमायतनगर पोलिसांनी गोकुळ धाब्यावरील चोरी, रेल्वे स्टेशन रोडवरील दुचाकी चोरी आणि तीन म्हशींच्या चोरीच्या प्रकरणांचा गांभीर्याने तपास करून दोषींना शोधावे. चोरीला गेलेला मुद्देमाल हस्तगत करून नागरिकांमधील भीती दूर करण्यासाठी ठोस कारवाई करावी, ही अपेक्षा आहे. चोरट्यांना मोकळे रान मिळणार की कायद्याचा धाक निर्माण होणार? हिमायतनगरकरांच्या या प्रश्नाचे उत्तर आता प्रत्यक्ष कारवाईतून मिळाले पाहिजे!
