नांदेड | नांदेड शहरात वैद्यकीय शिक्षण घेणाऱ्या २५ वर्षीय विद्यार्थिनीने वस्तीगृहात गळफास घेऊन आत्महत्या केल्याची धक्कादायक घटना शुक्रवारी हडको परिसरात घडली. आकांक्षा मुंजाजी गायकवाड असे मृत विद्यार्थिनीचे नाव असून, या प्रकरणी वस्तीगृह चालक व राष्ट्रवादी काँग्रेस (अजित पवार गट) चे प्रदेश चिटणीस जीवन घोगरे पाटील यांच्याविरोधात आत्महत्येस प्रवृत्त केल्याचा तसेच अॅट्रॉसिटी कायद्यान्वये गुन्हा दाखल करण्यात आला आहे.
मिळालेल्या माहितीनुसार, आकांक्षा गायकवाड ही हडको येथील शामराव कदम होमिओपॅथिक महाविद्यालयात द्वितीय वर्षाचे शिक्षण घेत होती. तिचे आई-वडील वीटभट्टीवर मजुरी करून उदरनिर्वाह करतात. शिक्षणासाठी ती मागील दोन वर्षांपासून हडको परिसरातील जीवन घोगरे पाटील यांच्या इमारतीत सुरू असलेल्या कॉट-बेसिस वसतीगृहात राहत होती.
शुक्रवारी दुपारी ती वस्तीगृहातील खोलीत पंख्याला गळफास घेतलेल्या अवस्थेत आढळून आली. घटनेची माहिती मिळताच ग्रामीण पोलीस ठाण्याचे पोलीस निरीक्षक ओमकांत चिंचोळकर यांनी तातडीने घटनास्थळी धाव घेत पंचनामा केला.
दरम्यान, विद्यार्थिनीच्या कुटुंबीयांनी वस्तीगृह चालकावर गंभीर आरोप केले आहेत. गेल्या सुमारे आठ महिन्यांपासून वसतीगृहाची फीस थकल्याच्या कारणावरून जीवन घोगरे पाटील हे आकांक्षाला मानसिक त्रास देत असल्याचा आरोप कुटुंबीयांनी केला. या त्रासाला कंटाळूनच तिने आत्महत्या केल्याचा दावा नातेवाईकांनी केला आहे.
सदर वसतीगृहात सुमारे ४० हून अधिक मुली कॉट-बेसिसवर राहत असून दरमहा सुमारे अडीच हजार रुपये फी आकारली जात होती, अशी माहिती समोर आली आहे. तसेच या वसतीगृहाला अधिकृत परवानगी नसल्याचीही चर्चा सुरू आहे.
दरम्यान, आरोपीवर गुन्हा दाखल करण्याच्या मागणीसाठी नातेवाईकांनी ग्रामीण पोलीस ठाण्यात ठाण मांडले होते. अखेर रात्री उशिरा ग्रामीण पोलिसांनी तक्रारीवरून जीवन घोगरे पाटील यांच्या विरोधात आत्महत्येस प्रवृत्त करणे व अॅट्रॉसिटी कायद्यान्वये गुन्हा दाखल केला आहे. या घटनेमुळे शहरात मोठी खळबळ उडाली असून पुढील तपास ग्रामीण पोलीस करीत आहेत.
