श्रीक्षेत्र माहूर, राज ठाकूर। आदिवासी आणि दुर्गम भागातील जनसामान्यांना केंद्रस्थानी ठेवून गॅलक्सी हेल्थकेअर नांदेड आणि माहूर तालुका डॉक्टर्स संघटनेच्या संयुक्त विद्यमानाने मागील ३८ महिन्यांपासून सुरू असलेल्या आठवडी शिबिरांचे १०० वे भव्य शिबिर माहूर येथील स्वामी समर्थ अन्नछत्र मंडळाच्या प्रांगणात११ एप्रिल ते १३ एप्रिल २०२५ या कालावधीत आयोजीत करण्यात आले असून, या शिबिराचे उद्घाटन नांदेड जिल्ह्याचे कर्तव्यदक्ष जिल्हाधिकारी राहुल कर्डीले यांच्या हस्ते होणार असल्याची माहिती पत्रकार परिषदेत माहूर तालुका डॉक्टर्स संघटनेच्या वतीने देण्यात आली आहे.
मराठवाड्यातील नांदेड हे सामाजिक, सांस्कृतिक, शैक्षणिक, राजकीय व आरोग्य विषयी क्षेत्रात अग्रगण्य असणारे शहर आहे. या शहरात अनेक नामांकित तज्या डॉक्टरांची हॉस्पिटल्स आहेत, रुग्णांच्या उपचारासाठी नवीन आधुनिक तंत्र ज्ञानाबरोबरच तज्ञ डॉक्टरांच्या माध्यमातून तातडीने योग्य निदान करून उपचार केले जातात, सहसा पुणे, मुंबई अथवा हैदराबाद इत्यादी मोठ्या ठिकाणी उपचारासाठी जाण्याची कचितच गरज पडते. त्यामुळे नांदेड येथे योग्य त्या उपचार सेवा मिळतात.
नांदेड शहरामध्ये आरोग्य व्यवसाय क्षेत्रातील वाढ लक्षणीय आहे. या व्यवसायातील काही डॉक्टर मंडळी आपल्या व्यवसायाबरोबरच सामाजिक दायित्वाच्या भावनेतून सुद्धा कार्य करत असतात. यातील बोरबन परिसरातील डॉ. नितीन जोशी यांच्या गॅलक्सी हॉस्पिटलमध्ये पचनसंस्थेच्या मार्गातील अवयवांच्या गंभीर आजारांचे, यकृत, पित्ताशय आणि स्वादुपिंड इत्यादी अवयवांतील कैंसरसहित आजारांचे निदान व उपचार केले जातात. या आजारांच्या उपचारासाठी गरजू व गरीब रुग्णांसाठी ते फिरते एंडोस्कोपी रुग्णालयाच्या माध्यमातून गावोगावी फिरून सेवा देत आहेत. मोफत नाममात्र रजिस्ट्रेशन नोंदणी फिस आकारून आतापर्यंत ९९ शिबिरे त्यांनी मराठवाड्यात घेतली आहेत.
आता शंभरावे मोफत शिबिर स्वामी समर्थ अन्नछत्र, माहूरगड येथे दिनांक ११-१३ एप्रिल २०२५ रोजी होत आहे. . या फिरत्या एन्डोस्कोपी रुग्णालयाची सुरवात १९ फेब्रुवारी २०२२ रोजी करण्यात आली होती. आपल्या पदरचे जवळपास ५५ लाख रुपये खर्च करून हे फिरते एन्डोस्कोपी रुग्णालय त्यांनी स्वतः बनवलेले आहे. गेल्या तीन वर्षातत्यांच्या चमूने नांदेडच्या आजुबाजूला असलेल्या सहा जिल्ह्यातील ५१ गावांत २५ हजार किलोमीटरचा प्रवास करीत व ९९ शिबीर पार पाडली आहेत. माहूरगड येथे होणारे हे शंभराचे शिबिर आहे.
महाराष्ट्राच्या ग्रामीण भागातील पहिल्या आणि एकमेव फिरत्या एन्डोस्कोपी रुग्णालयाच्या, ‘एन्डोस्कोपी आपल्या दारी’ या उपक्रमाअंतर्गत, तरुण वयात पचनसंस्थेच्या कॅन्सर आणि इतर गंभीर आजारामुळे होणारे असंख्य मृत्यू कमी करण्याच्या उद्देशाने झपाटलेल्या गॅलक्सीने उच्च दर्जाची वैद्यकीय सुविधा समाजातील शेवटच्या गरीब गरजू रुग्णा पर्यंत पुरवण्याचे ध्येय बाळगले आहे. ‘समर्पित आणि ध्येयवादी रुग्णसेवा’ हा उद्देश मनाशी बाळगून ते कार्य करत आहेत.
व्यक्तीच्या आहार, विहार व अनुवंशिकतेतून बळावणारे रोग आणि त्या रोगांचे योग्य निदान होऊन उपचार मिळणे अत्यंत महत्त्वाचे आहे. एक रुग्ण व सणाचा नातेवाईक म्हणून ज्या काही आर्थिक, मानसिक वेदना व अडचणी व्यक्तीस होतात त्या फक्त त्या कुटुंबालाच माहित असतात. रोगांचे निदान योग्य वेळी होऊन योग्य उपचार मिळवून तो बरा झाला म्हणजे, त्या रुग्णाच्या कुटुंबात होणारी मानसिक व आर्थिक अडचण दूर होण्यास आधार मिळतो. त्यासाठी व्यक्तीच्या आरोग्य संदर्भात विविध रोगाच्या जनजागृतीसाठी अशी शिबिरे होणे महत्त्वाचे आहे आणि आजच्या काळात हा विचार बाळगणे हीच मोठी सेवा आहे.
आपल्या देशात आजही मोठ्या प्रमाणात अंधश्रद्धा अज्ञान असल्यामुळे आरोग्याच्या दृष्टीने मोठी तफावत आहे. त्यासाठी आरोग्यविषयक शिबिरांच्या माध्यमातून वेळोवेळी वेगवेगळी शिबिरे आयोजित करून सतत जनजागृती करणे आवश्यक आहे. सामाजिक बांधिलकीच्या भावनेतून कार्य करणाऱ्या डॉक्टरांच्यामध्ये डॉ. नितीन जोशी हे एक आहेत. सामाजिक दायित्याच्या कर्तव्य भावनेतून आपल्या आरोग्यविषयक ज्ञानाचा उपयोग समाजातील तळागाळातील गरजू रुग्णापर्यंत व्हावा ही त्या मागची त्यांची भूमिका आहे.
वैद्यकीय व्यवसायाला ‘नोबल प्रोफेशन’ असे संबोधले जाते त्यामुळे प्रामाणिकपणा, पारदर्शकता, रुग्णहित, संवेदनशीता अशी अनेक मूल्ये या वैद्यकीय सेवेत निश्चित आहेत. जनआरोग्य अभियानाच्या माध्यमातून, रुग्णहक्क व त्याचे कर्तव्य जागृत नागरिक, दानशूर व्यक्ती यांच्या समन्वयातून सुदृढ समाज निर्मितीसाठी असे कार्य होणे आवश्यक आहे.
या शिबिरासाठी माहूर येथील डॉ. राम कदम, डॉ अभिजित कदम डॉ.पी.डी. जगताप, डॉ अजय जाधव, प्रसन्न पांडे, निरंजन केशवे, राजेश सामशेट्टीवार, जुनेद बावाणी, वाई येथील डॉ. बाबा डाखोरे, सुप्रिया गावंडे, झनक मानकर, पिंटु चव्हाण किनवट येथील डॉ. अशोक बेलखोडे साने गुरुजी रुग्णालय यांचेकडे १०० रुपये नोंदनी शुल्क भरून नाव नोंदनी करावी, या शिबिरात डॉ. नितिन जोशी, नांदेड डॉ. सुर्य प्रकाश भंडारी, पुसद डॉ संजय कुलकर्णी मिरज, माधव चंबुले उदगीर अनंत सुर्यवंशी स्वप्ना बुलबुले, विनायक कुलदीपक रोहित बुलबुले सर्व नांदेड ई,तज्ञ डॉक्टर येणार आहेत.
