आमदार बाबुराव कदम यांच्या हस्ते पूजन; प्रवाशांना मिळणार सुरक्षित व सुखकर प्रवासाची सुविधा
नांदेड/हदगांव/हिमायतनगर, अनिल मादसवार| हदगाव आगाराच्या ताफ्यात महाराष्ट्र राज्य मार्ग परिवहन महामंडळाच्या नव्या चार ‘राजमाता जिजाऊ’ बसगाड्या दाखल झाल्या आहेत. या बसगाड्यांचे विधिवत पूजन आमदार बाबुराव पाटील कदम कोहळीकर यांच्या हस्ते करण्यात आले. नव्या बससेवेमुळे हदगाव–हिमायतनगर विधानसभा मतदारसंघातील प्रवाशांना अधिक सुरक्षित, आरामदायी आणि दर्जेदार प्रवासाची सुविधा उपलब्ध होणार आहे.
सार्वजनिक वाहतूक व्यवस्था अधिक सक्षम करण्याच्या दिशेने या नव्या बसगाड्यांची भर महत्त्वाचे पाऊल मानले जात आहे. प्रवाशांच्या वाढत्या गरजा लक्षात घेता नवीन बसगाड्यांमुळे सेवा अधिक गतिमान व गुणवत्तापूर्ण होईल, असा विश्वास आमदार बाबुराव कदम यांनी व्यक्त केला.
यावेळी आगारप्रमुख धर्माधिकारी, माजी जिल्हा परिषद सदस्य ढोले बापू, नगराध्यक्ष प्रतिनिधी भास्कर वानखेडे, शहरप्रमुख बबन माळोदे, युवासेना जिल्हाप्रमुख संदेश पाटील, देशमुख काका, नगरसेवक गोपाल सारडा, नामदेव वाकोडे, पांडुरंग जाधव, बालाजी शिंदे, नगरसेवक प्रतिनिधी बालाजी राठोड, गजानन मस्के, गजानन पतंगे, शरद कदम, अशोक पवार, सुभाष पवार, दिनेश मेहत्रे, राम सूर्यवंशी, विजय शिंदे, आदिल खान, अल्ताफ खान यांच्यासह आगारातील अधिकारी-कर्मचारी, शिवसैनिक, पदाधिकारी, कार्यकर्ते व अनेक मान्यवर उपस्थित होते.
महाराष्ट्र राज्य मार्ग परिवहन महामंडळाच्या या उपक्रमाचे स्वागत करताना, नव्या बसगाड्यांमुळे प्रवाशांना अधिक चांगली सेवा मिळेल, असा विश्वास उपस्थितांनी व्यक्त केला.
