हिमायतनगर, अनिल मादसवार| हिमायतनगर शहरातील स्वच्छतेबाबत कोणतीही तडजोड न करता नवनिर्वाचित व लोकनियुक्त नगराध्यक्ष शेख रफिकभाई यांनी थेट मैदानात उतरून स्वच्छता कर्मचाऱ्यांच्या पाठीशी उभे राहत शहरातील बसस्थानक परिसर व मुख्य रस्त्यांची स्वच्छता स्वतः उपस्थित राहून करून घेण्यास सुरुवात केली आहे.
स्वच्छता केवळ कागदावर न राहता प्रत्यक्षात दिसावी, शहरातील नागरिकांकडून स्वच्छतेबाबत कोणतीही तक्रार येऊ नये, यासाठी नगराध्यक्षांनी नगरपंचायत स्वच्छता विभागातील कर्मचाऱ्यांना “स्वच्छतेत हलगर्जीपणा खपवून घेतला जाणार नाही” असा ठणकावून इशारा दिला.
यावेळी बोलताना नगराध्यक्ष शेख रफिकभाई म्हणाले की,“नागरिकांनी शहराच्या स्वच्छतेबाबत चिंता करू नये. स्वच्छतेसह शहरातील इतर कोणतीही समस्या असल्यास थेट नगरपंचायतीकडे किंवा माझ्याकडे कळवावी. त्या समस्यांचे तात्काळ निराकरण केले जाईल.”
नगराध्यक्ष स्वतः रस्त्यावर उभे राहून, कर्मचाऱ्यांच्या मागे राहून स्वच्छता करून घेत असल्याचे दृश्य पाहून अनेक नागरिकांनी समाधान व्यक्त केले. शहराच्या स्वच्छतेसाठी लोकप्रतिनिधी स्वतः पुढाकार घेत असल्याने नागरिकांमध्ये सकारात्मक प्रतिक्रिया उमटत असून, “ह्यालाच म्हणतात काम करून घेणे” अशा शब्दांत नागरिकांकडून सोशल मीडियातून कौतुक होत आहे.
नवनिर्वाचित नगराध्यक्ष रफिक सेठ यांनी आपल्या कार्यकाळाच्या सुरुवातीलाच दाखवलेली कार्यतत्परता, जबाबदारीची जाणीव आणि लोकाभिमुख दृष्टिकोन निश्चितच इतर लोकप्रतिनिधींना प्रेरणादायी ठरणारा असल्याची भावना शहरवासीयांतून व्यक्त होत आहे.
नुकतेच शहरातील अस्वच्छतेबाबत काही जागरूक नागरिक व सामाजिक कार्यकर्त्यांनी सोशल मीडियातून नाराजी व्यक्त केली होती. या बाबीला नवनिर्वाचित नगराध्यक्ष शेख रफिक शेख मेहबूब यांनी गांभीर्याने घेऊन शहराच्या स्वच्छतेला प्रथम प्राधान्य दिले असल्याने नागरिकाकडून समाधान व्यक्त केले जात आहे. अशाच प्रकारे आगामी पाच वर्षात शहरातील जनतेला पिण्याचे स्वच्छ पाणी, आरोग्याच्या सुरक्षितेला प्राधान्य देऊन शासनाच्या स्वच्छ शहर सुंदर शहर उपक्रमाला साजेशे हिमायतनगर बनविण्यास प्राधान्य द्यावे अशी मागणी जनतेतून केली जात आहे.
