नांदेड| बीडमध्ये दि.३ऑगस्ट रोजी शेतकरी कामगार पक्षाच्या वर्धापन दिना निमित्ताने निवडक दहा व्यक्तींना पुरस्कार देऊन गौरविण्यात आले. त्यामध्ये नांदेड येथील कामगार चळवळीतील लढाऊ साथी कॉ. उज्वला पडलवार यांचा समावेश आहे.
शेतकरी कामगार पक्षाचे नेते भाई मोहन गुंड यांनी केजमध्ये सुरू असलेला क्रांतिसिंह नाना पाटील यांच्या नावाचा पुरस्कार सोहळा बीडमध्ये घेऊन आले ही कौतुकाची बाब आहे. क्रांतिसिंह नाना पाटील यांचे कार्य चंद्र-सूर्य असेपर्यंत जनमानसात जिवंत राहील.
बीड येथील यशवंतराव चव्हाण नाट्यगृहात रविवारी (दि.३) शेतकरी कामगार पक्ष व क्रांतिसिंह नाना पाटील शेतकरी विकास प्रतिष्ठान यांच्या संयुक्त विद्यमाने पुरस्कार वितरण आणि क्रांतिसिंह नाना पाटील व लोकशाहीर अण्णाभाऊ साठे यांच्या जयंतीनिमित्त अभिवादन कार्यक्रम आयोजित करण्यात आला होता. कार्यक्रमाच्या अध्यक्षस्थानी खा.बजरंग सोनवणे हे होते.
शेकापक्षाचे ध्वजारोहण राज्य चिटणीस मंडळ सदस्या चित्राताई गोळेगावकर व प्रा. उमाकांत राठोड यांच्या हस्ते झाले. यावेळी ज्येष्ठ नेत्या सुशिला मोराळे, माजी आमदार उषा दराडे, शेकापचे जिल्हा चिटणीस भाई विष्णूपंत घोलप, राजकुमार घायाळ (हमाल मापाडी महामंडळ), अॅड.अजय बुरांडे (माकप), इकबाल पेंटर, चंद्रकांत चव्हाण (शिक्षक आघाडी), भाऊराव प्रभाळे (भाकप), राजेश घोडे (आझाद क्रांती सेना), रोहिदास जाधव (एसएफआय), प्रा. पंडित तुपे (युक्रांद), गणेश मस्के (संभाजी ब्रिगेड), ॲड. राहुल वायकर (विभागीय संभाजी ब्रिगेड), नितीन सोनवणे (पँथर सेना), सुभाष लोणके (डीपीआय), ॲड.शिवाजी कांबळे (समाजवादी पक्ष), अशोक येडे (आप) आदी मान्यवर उपस्थित होते.
कॉ.उज्वला पडलवार यांचे कार्य उल्लेखनीय असून त्यांनी अनेक यशस्वी आंदोलने करून कामगार कष्टकऱ्यांना न्याय मिळवून दिला आहे. कॉ.पडलवार ह्या सेंटर ऑफ इंडियन ट्रेड युनियन (सीटू) राज्य सचिव असून नांदेड जिल्हाध्यक्ष म्हणून काम पाहतात.त्यांच्या कार्याची दखल शेतकरी कामगार पक्षाने घेतली असून त्यांना कामगार क्षेत्रातील राज्यस्तरीय पुरस्काराने सन्मानित केले म्हणजे त्यांच्या कामाची ही पावती आहे असे सीटू जिल्हा जनरल सेक्रेटरी कॉ.गंगाधर गायकवाड मनोगत व्यक्त केले आहे. कॉ.उज्वला पडलवार यांचा जन्मदिवस ४ ऑगस्ट रोजी आहे आणि आदल्या दिवशी त्यांना राज्यस्तरीय पुरस्कार देऊन गौरविण्यात आल्यामुळे सर्व स्तरातून त्यांना सदिच्छा देण्यात येत आहे.
