लातूर| लातूर विभागातील लातूर, बीड, नांदेड व धाराशिव या जिल्ह्यातील “ई” वर्ग संस्था (250 पर्यंत किंवा त्यापेक्षा कमी सभासद असणाऱ्या ) सहकारी गृहनिर्माण संस्थांच्या (cooperative housing society) निवडणुका घेण्यात येणार आहे. यासाठी नियुक्त करावयाच्या निवडणूक निर्णय अधिकारी यांची नामतालिका तयार करण्यासाठी 20 ते 31 जानेवारी 2025 या कालावधीत पात्र उमेदवारांनी विहित नमुन्यात अर्ज करण्याचे आवाहन विभागीय सहनिबंधक सुनिल शिरापूरकर यांनी केले आहे.
अर्ज सादर करण्यासाठी पुढीलप्रमाणे पात्रता असलेल्या उमेदवारांकडून अर्ज मागविण्यात येत आहे. 1. शासकीय विभागातील (सहकार विभागातील कार्यरत अधिकारी,कर्मचारी वगळून) स्थानिक स्वराज्य संस्थेतील, सहकारी संस्थेतील कायम कार्यरत अधिकारी, कर्मचारी (वरिष्ठ लिपीक किंवा त्यापेक्षा जादा दर्जा असलेले कर्मचारी), 2. प्रमाणित लेखापरीक्षक, 3. वकील ( पाच वर्षाचा कामाचा अनुभव), 4. शासकीय सेवेतून सेवानिवृत्त झालेला अधिकारी, कर्मचारी (वय 65 वर्षापेक्षा जास्त नसलेले).
विहित नमुन्यातील अर्ज 20 जानेवारी 2025 ते 31 जानेवारी, 2025 या कालावधीत शासकीय सुट्टीचे दिवस वगळून खालील कार्यालयात कार्यालयीन वेळेत मिळतील. जिल्हा उपनिबंधक, सहकारी संस्था, लातूर (पत्ता-मध्यवर्ती प्रशासकीय इमारत, तळमजला, लातूर), जिल्हा उपनिबंधक, सहकारी संस्था, बीड (पत्ता- सहकार शक्ती इमारत, जालना रोड, बीड), जिल्हा उपनिबंधक, सहकारी संस्था, नांदेड (पत्ता-सहकार भवन, भुविकास बँक इमारत, दुसरा मजला, आयटीआय समोर, नांदेड), जिल्हा उपनिबंधक, सहकारी संस्था,
धाराशिव (मध्यवर्ती प्रशासकीय इमारत, पहिला मजला, धाराशिव). अर्जदारांनी विहित नमुन्यातील अर्ज 31 जानेवारी, 2025 अखेर संबंधित कार्यालयात कार्यालयीन वेळेत सादर करण्याची दक्षता घ्यावी. याबाबतची जाहीर सूचना विभागीय सहनिबंधक, सहकारी संस्था, लातूर यांच्या कार्यालयाच्या नोटीस बोर्डवर व संबंधित जिल्हा उपनिबंधक सहकारी संस्थांच्या कार्यालयाच्या नोटीस बोर्डवर प्रसिद्ध करण्यात आलेली आहे.