हिमायतनगर| अल्पवयीन मुलीस फूस लाऊन पळवून नेऊन बलात्कार केल्याच्या गुन्ह्यात मुख्य आरोपी गेल्या 8 महिन्यापासून फरार होता. फरार मुख्य आरोपीसह त्याच्या साथीदाराला हिमायतनगर पोलिसांनी तेलंगणा राज्यातील निर्मल भागातील गाजुलपेठ परिसरातुन रविवारी मध्यरात्रीच्या वेळी अटक केली आहे. पोलिसांच्या या धडाकेबाज कामगिरीचे सर्व स्तरातून अभिनंदन केले जात आहे. सोमवारी दुपारी दोन्ही आरोपिंना न्यायालयात हजार केले असता न्यायाधीश महोदयांनी अधिक चौकशीसाठी आरोपींला एक दिवसाची पोलीस कस्टडी दिली आहे.
हिमायतनगर पोलीस ठाण्यात आरोपी विरुद्ध गु.र.क्र 231/2023 कलम 363,376(2) भादवी व 4,12 पोक्सो कायद्यानुसार गुन्हा दाखल करण्यात आला होता. आरोपीवर अल्पवयीन मुलीस फूस लाउन पळून नेऊन बलात्कार केल्याचा गुन्हा दाखल होताच आरोपी फरार झाल्याने हिमायतनगर पोलीस गेल्या 8 महिन्यापासून त्यांच्या शोधात होते. सदर गुन्ह्यात फरारी असलेले मुख्य आरोपी हे तेलंगणा राज्यातील निर्मल भागातील गाजूलपेठ येथील एका घरात लपून बसल्याची गुप्त माहिती खबऱ्यामार्फत प्राप्त झाली होती. या संदर्भाची माहिती वरिष्ठ अधिकारी पोलीस अधीक्षक श्रीकृष्ण कोकाटे, अप्पर पोलीस अधीक्षक श्री. धरणे यांना देऊन त्यांच्या मार्गदर्शनाखाली सपोनी. मददे व पोलीस पथक तात्काळ निर्मल, तेलंगणा येथे रविवारी दुपारी रवाना झाले. पोलीस पथकाने गुप्त बातमीदाराची माहिती आणि तांत्रिक मदतीने अथक परिश्रम घेऊन गुन्ह्यातील आरोपींचा माघ काढला.
सदरील पथक खाजगी वाहनाने तेलंगणा राज्य पोचल्यानंतर निर्मल येथील गाजुलपेठ परिसरातील एका घरात आरोपी लपून असल्याचे लक्षात घेऊन मोठ्या शिताफीने मुख्य आरोपी 1) इम्रान खान मजीद खान वय 23 वर्ष रा. हिमायतनगर त्याचा साथीदार 2) अब्दुल रहमान शेख चाँदपाशा वय 18 वर्ष रा. हिमायतनगर यास त्याब्यात घेऊन अटक करण्यात आली आहे. हि कार्यवाही हिमायतनगर ठाण्याचे पोलीस निरीक्षक अमोल भगत यांच्या पुढाकारातून सहाय्यक पोलीस निरीक्षक नामदेव मद्दे, सहाय्यक पोलीस उपनिरीक्षक कोमल कागणे, पोहेका श्यामसुंदर नागरगोजे यांनी मोठ्या शिताफीने पकडून आणले आहे. आज आरोपिंना हिमायतनगर येथील न्यायालयात हजर करून चौकशीसाठी तीन दिवसाची पोलीस कस्टडी मागितली होती. मात्र न्यायालयाने एक दिवशी पोलीस कस्टडी दिली आहे. पोलिसांनी केलेल्या या कामगिरीचे पोलीस अधीक्षक श्रीकृष्ण कोकाटे यांच्यासह अन्य वरिष्ठ अधिकारी आणि सर्व स्तरातून अभिनंदन केले जात आहे.
आरोपी फरार झाल्यानंतर पोलिसांनी त्या अल्पवयीन मुलीस आईवडिलांकडे आणून सोडले. मात्र ती मुलगी मुख्य आरोपिसॊबत लग्न करण्याचा अट्टाहास धरत होती. यामुळे समाजात होणाऱ्या बदनामीच्या भीतीने १७ वर्षीय पोटच्या मुलीची जन्मदात्या आई- वडिलांनी १ फेब्रुवारी २०२४ च्या मध्यरात्रीला कोयत्याने वार करून खून केला होता हे विशेष.