हिमायतनगर, प्रतिनिधी | शहरातील सार्वजनिक नळ पाणीपुरवठा योजनेच्या जलकुंभाचे काम सुरू असताना घडलेल्या दुर्दैवी अपघातात एका मजुराचा मृत्यू झाल्याने परिसरात हळहळ व्यक्त होत आहे. शनिवारी दुपारच्या सुमारास ही घटना घडली.
मिळालेल्या माहितीनुसार, शहरातील पाणीपुरवठा योजनेच्या जलकुंभाच्या अंतिम टप्प्यातील कामासाठी संतोष श्रावण ठोके (वय ४०, रा. देवाचाळ, नांदेड) हे मजूर काम करीत होते. काम सुरू असताना अचानक त्यांचा तोल गेला आणि ते जलकुंभाच्या उंच भागावरून खाली कोसळले.
उंचावरून खाली पडल्याने त्यांच्या डोक्याला गंभीर दुखापत झाली. अपघाताची माहिती मिळताच हिमायतनगर पोलिसांनी घटनास्थळी धाव घेत पंचनामा केला. हिमायतनगर ठाण्यात या घटनेची आकस्मिक मृत्यू म्हणून नोंद करण्यात आली असून, पोलिसांकडून पुढील तपास सुरू आहे.
दरम्यान, सार्वजनिक पाणीपुरवठा योजनेचे काम करताना मजुरांच्या सुरक्षेच्या उपाययोजनांचा प्रश्न या दुर्घटनेनंतर पुन्हा ऐरणीवर आला आहे. उंचावर काम करणाऱ्या कामगारांना आवश्यक सुरक्षा साधने व खबरदारी उपलब्ध करून देणे गरजेचे असल्याची मागणी नागरिकांतून होत आहे. या घटनेमुळे ठोके यांच्या कुटुंबीयांवर दुःखाचा डोंगर कोसळला असून, शासन व संबंधित यंत्रणांनी त्यांच्या कुटुंबीयांना तातडीने आर्थिक मदत द्यावी, अशी मागणी नागरिकांनी केली आहे.
