नांदेड| पीएम श्री जवाहर नवोदय विद्यालय, शंकरनगर (ता. बिलोली, जि. नांदेड) येथे शैक्षणिक वर्ष २०२७-२८ साठी इयत्ता सहावीच्या प्रवेश परीक्षेची ऑनलाइन अर्ज प्रक्रिया सुरू झाली आहे. जवाहर नवोदय विद्यालय निवड चाचणी (JNVST-2027) साठी पात्र विद्यार्थ्यांनी ३१ जुलै २०२६ पर्यंत ऑनलाइन अर्ज करावेत, असे आवाहन विद्यालय प्रशासनाने केले आहे.
नांदेड जिल्ह्यातील मान्यताप्राप्त शाळांमध्ये शैक्षणिक वर्ष २०२६-२७ मध्ये इयत्ता पाचवीत शिक्षण घेणारे आणि नांदेड जिल्ह्याचे बोनाफाईड रहिवासी असलेले विद्यार्थी या प्रवेशासाठी पात्र ठरणार आहेत. विद्यार्थ्यांनी इयत्ता तिसरी, चौथी आणि पाचवीचे शिक्षण सलग पूर्ण केलेले असणे आवश्यक आहे. तसेच विद्यार्थ्याची जन्मतारीख १ मे २०१५ ते ३१ जुलै २०१७ या कालावधीतील असावी.
अनुसूचित जाती, अनुसूचित जमाती तसेच इतर मागासवर्गीय प्रवर्गातील विद्यार्थ्यांना शासनाच्या नियमानुसार वैध जात प्रमाणपत्र सादर करणे आवश्यक आहे. विशेष म्हणजे या प्रवेश प्रक्रियेसाठी कोणतेही अर्ज शुल्क आकारले जाणार नाही.
JNVST-2027 प्रवेश परीक्षा २८ नोव्हेंबर २०२६ रोजी घेण्यात येणार आहे. अर्जाची अंतिम मुदत जवळ येत असल्याने पालकांनी शेवटच्या दिवसाची प्रतीक्षा न करता आवश्यक कागदपत्रांसह ऑनलाइन अर्ज प्रक्रिया पूर्ण करावी आणि कागदपत्रे योग्य पद्धतीने अपलोड करावीत, असे आवाहन विद्यालयाचे प्राचार्य एस. जी. माण्डले यांनी केले आहे.
प्रवेश प्रक्रियेची अधिक माहिती मिळविण्यासाठी प्रवेश अधिसूचनेतील QR कोड स्कॅन करावा. तसेच अधिक माहितीसाठी श्रीमती बबिता कुतुर (९१३०९७७९२१) किंवा विष्णू यादव (९९२६९२८७३२) यांच्याशी संपर्क साधता येईल.
