Leopard Thrilling Rescue : पाण्याच्या शोधात विहिरीत पडलेल्या बिबट्याचे थरारक रेस्क्यू

श्रीक्षेत्र माहूर, राज ठाकूर| उन्हाच्या तीव्रतेमुळे जंगलातील नैसर्गिक जलस्रोत आटत चालल्याने वन्यजीव पाण्याच्या शोधात मानवी वस्तीकडे वळत असल्याचे चित्र सध्या दिसून येत आहे. याच पार्श्वभूमीवर माहूर तालुक्यातील गोकुळ येथे एक धक्कादायक घटना घडली.

बुधवार, १८ मार्च रोजी रात्री पाणी व अन्नाच्या शोधात भटकणारा एक बिबट्या गोकुळ येथील सुमारे ३० फूट खोल विहिरीत पडला. गुरुवारी (१९ मार्च) सकाळी शेतकरी शिवम राजू यमजलवाड हे पिकांना पाणी देण्यासाठी विहिरीजवळ गेले असता त्यांना विहिरीत बिबट्या असल्याचे दिसून आले. त्यांनी तात्काळ गावकरी व वनविभागाला याची माहिती दिली.

घटनेची माहिती मिळताच माहूरचे वनपरिक्षेत्र अधिकारी रोहित जाधव यांच्या नेतृत्वाखाली वनविभागाचे पथक पिंजऱ्यासह घटनास्थळी दाखल झाले. विहीर ३० फूट खोल असून त्यात सुमारे १५ फूट पाणी असल्याने बचावकार्य मोठे आव्हानात्मक ठरत होते.

वनविभाग आणि MH-29 रेस्क्यू टीमने अत्यंत नियोजनबद्ध पद्धतीने पिंजरा विहिरीत उतरवला. काही तासांच्या अथक प्रयत्नांनंतर बिबट्याला सुरक्षितपणे पिंजऱ्यात जेरबंद करण्यात यश आले. सदर बिबट्या अंदाजे ९ महिन्यांची मादी असून वैद्यकीय तपासणीत ती पूर्णपणे सुखरूप असल्याचे स्पष्ट झाले. वरिष्ठ अधिकाऱ्यांच्या मार्गदर्शनाखाली तिला खरबी येथील जंगलात तिच्या नैसर्गिक अधिवासात सोडण्यात आले.

या बचाव मोहिमेत वनपरिक्षेत्र अधिकारी रोहित जाधव, वनपाल मनोहर कतुंलवार, मीर साजिद अली, वनरक्षक एफ.जी. माळेकर, ओम वरकड, संदीप तुपे, राकेश सोपरवर, मसू मजलवाड, वनसेवक वसंता चव्हाण, वसंत कुमारे यांच्यासह MH-29 रेस्क्यू टीमचे मोहन मुर्खे, शिवानंद कुटे, श्याम कुटे, सैफ अली शेख, ऋषिकेश कोटावर, विवेक तराडे, निलेश मेश्राम, अंकित कोथले, दिनेश पिंपरे, जीवन तडसे, सचिन कोकणे यांनी मोलाची भूमिका बजावली.

तसेच सिंदखेडचे सपोनी रमेश जाधवर आपल्या कर्मचाऱ्यांसह उपस्थित होते.
वनविभाग, पोलीस प्रशासन आणि रेस्क्यू टीमच्या समन्वयामुळे ही मोहीम यशस्वी ठरली असून एका वन्यजीवाचे प्राण वाचवण्यात यश आले आहे.