मुंबई| ‘तीर्थ विठ्ठल, क्षेत्र विठ्ठल’ या कॉफीटेबल बुकचे प्रकाशन देवेंद्र फडणवीस यांच्या हस्ते त्यांच्या ‘वर्षा’ निवासस्थानी आज करण्यात आले.
या प्रसंगी ज्येष्ठ साहित्यिका अरुणा ढेरे, ज्येष्ठ गायिका पद्मश्री डॉ. अश्विनी भिडे-देशपांडे, पुस्तकाचे निर्माते विनोद पवार, माजी खासदार विनय सहस्त्रबुद्धे, तसेच मुख्यमंत्र्यांच्या प्रधान सचिव अश्विनी भिडे आणि शिष्टमंडळातील सदस्य उपस्थित होते.
मुख्यमंत्री फडणवीस म्हणाले की, या सुंदर आणि आकर्षक कॉफीटेबल बुकचे प्रकाशन करताना त्यांना विशेष आनंद होत आहे. महाराष्ट्राची संस्कृती आणि परंपरा वारीतून प्रकट होते, जी पंढरपूर येथे विठ्ठलाच्या आराधनेत अनुभवता येते. प्रत्येक वारीत अनेक कथा जन्म घेतात आणि त्या या पुस्तकाच्या माध्यमातून अनुभवता येणार आहेत.
ते पुढे म्हणाले की, तीर्थ आणि त्या तीर्थातील देव या दोन्हींचे महत्त्व या पुस्तकातून अधोरेखित झाले आहे. इतिहास, माहिती आणि समृद्ध छायाचित्रांमुळे हे कॉफीटेबल बुक संग्रहणीय ठरले आहे. महाराष्ट्राची सांस्कृतिक ओळख जगासमोर मांडण्यासाठी हे पुस्तक उपयुक्त ठरेल.
यासोबतच, पंढरपूरची वारी युनेस्को च्या अमूर्त सांस्कृतिक वारसा (Intangible Heritage) यादीत समाविष्ट करण्यासाठी सादर करण्यात येणार असून, त्यासाठी हे पुस्तक महत्त्वाची भूमिका बजावेल, असेही त्यांनी सांगितले.
