हिमायतनगर, अनिल मादसवार| तालुक्यातील पोटा सर्कलमधील शेतकऱ्यांना प्रधानमंत्री राष्ट्रीय कृषी विकास योजनेअंतर्गत कोरडवाहू क्षेत्र विकास योजनेंतर्गत निवड झालेल्या लाभार्थ्यांना पशुधन खरेदी करूनही अनुदानाची रक्कम न मिळाल्याचा गंभीर प्रकार समोर आला आहे. हिमायतनगर येथील संबंधित कृषी अधिकाऱ्यांवर कारवाईची मागणी करत शेतकरी आक्रमक झाले आहेत.
माहितीनुसार, तालुक्यातील कोरडवाहू क्षेत्रातील सुमारे ४५ लाभार्थ्यांची योजना मंजूर झाली होती. दिनांक १८ ऑक्टोबर २०२५ रोजी आयोजित जनावरांच्या बाजारातून अधिकाऱ्यांच्या उपस्थितीत पशुधन खरेदी करण्यात आले. मात्र त्यानंतर आजतागायत लाभार्थ्यांच्या खात्यात अनुदानाची रक्कम जमा झालेली नाही.
लाभार्थ्यांच्या म्हणण्यानुसार, प्रत्येकी सुमारे २५०० रुपयांपर्यंत रक्कम खर्च करून पशुधन खरेदी करण्यात आले. मात्र अनुदानासाठी वारंवार पाठपुरावा करूनही केवळ आश्वासने दिली जात असून प्रत्यक्षात निधी मिळालेला नाही.
या संदर्भात जिल्हाधिकारी कार्यालयाकडे लेखी तक्रार देण्यात आली असून संबंधित अधिकाऱ्यांवर निलंबनाची कारवाई करण्याची मागणी करण्यात आली. याची कोणतीही दाखल झाली नसल्याने दिनांक २३ फेब्रुवारी २०२६ पासून कृषी कार्यालयासमोर उपोषण सुरु करण्यात आली आहे.
दरम्यान, शेतकऱ्यांमध्ये संतापाची लाट असून शासनाने तात्काळ चौकशी करून प्रलंबित अनुदानाची रक्कम वितरित करावी, जोपर्यंत संबंधित अधिकारी कर्मचाऱ्याला निलंबित अथवा बडतर्फ केले जाणार नाही तोपर्यंत उपोषण मागे घेणार नाही असा पवित्रा संतोष फुलेवार, आनंदा जळपते त्यांच्यासह इतर शेतकरी सहकाऱ्यांनी घेतला आहे.
“वादळी वारे आणि विजांच्या कडकडाटात जीव धोक्यात घालून आम्ही शेतकऱ्यांच्या हक्कासाठी उपोषणाला बसलो आहोत. पण कृषी विभागाचा एकही अधिकारी किंवा कर्मचारी साधी विचारपूस करण्यासाठीही फिरकला नाही. ही शेतकऱ्यांच्या वेदनांची व मागण्यांची उघडपणे होत असलेली उपेक्षा आहे. आमच्या जीविताची जबाबदारी आता प्रशासनाने घ्यावी.” अशी संतापजनक प्रतिक्रिया उपोषणकर्ते आनंदा जळपते पोटा तालुका हिमायतनगर यांनी व्यक्त केली.
