नांदेड/लातूर | लातूर शहरात सुरू असलेल्या अवैध मटका व्यवसायावर नांदेड परिक्षेत्राचे पोलीस उप महानिरीक्षक (DIG) श्री. शहाजी उमाप यांच्या आदेशानुसार मोठी कारवाई करण्यात आली आहे. या कारवाईत १५ जणांविरुद्ध गुन्हा दाखल करण्यात आला असून १ लाख ४१ हजार रुपयांची रोकड जप्त करण्यात आली आहे.
DIG शहाजी उमाप यांनी अवैध जुगार व मटका व्यवसायावर आळा घालण्यासाठी आपल्या कार्यालयातील अधिकारी व अंमलदारांचे विशेष पथक लातूर शहरात पाठविले होते. सदर पथकाने दि. ४ फेब्रुवारी २०२६ रोजी सायंकाळी शाहू चौक ते गंजगोलाई रोडवरील गोजमगुंडे कॉम्प्लेक्स येथे सुरू असलेल्या मटका बुक्कीवर छापा टाकला.
या कारवाईत विजय उद्धवराव लांडगे (रा. उमरगा बोरी, ता. जि. लातूर) या मटका बुकी चालकास ताब्यात घेण्यात आले. त्याच्याकडून नगदी १,४१,००० रुपये, ३ मोबाईल फोन असा एकूण १,७५,१०० रुपयांचा मुद्देमाल हस्तगत करण्यात आला.
बुक्कीमधून जप्त करण्यात आलेल्या नोंदी व आरोपी विजय लांडगे याच्या कबुलीनुसार, गोविंद चंद्रसेन खाडप (पाटील) (रा. उमरगा बोरी, ता. जि. लातूर) हा सदर मटका बुक्कीचा मुख्य मालक असल्याचे निष्पन्न झाले आहे. खाडप याने लातूर शहरातील विविध भागात १३ एजंट नेमून मटका व्यवसाय चालवत असल्याचे स्पष्ट झाले आहे.
या प्रकरणी पोलीस ठाणे गांधी चौक, लातूर येथे गुन्हा र.नं. ८२/२०२६ अन्वये महाराष्ट्र जुगार कायदा कलम १२ (अ) अंतर्गत मटका बुकी चालक, मुख्य मालक व १३ एजंट अशा एकूण १५ जणांविरुद्ध गुन्हा दाखल करण्यात आला आहे. पुढील तपास पोउपनि सोनकांबळे करीत आहेत.
या यशस्वी कारवाईत नांदेड परिक्षेत्र कार्यालयातील सपोनि श्रीराम माचेवाड, पोहेकॉ प्रदीप खानसोळे, संजीव जिंकलवाड, पोकॉ गणेश धुमाळ व कामाजी गवळी यांनी सहभाग घेतला. दरम्यान, नागरिकांना अवैध व्यवसायांची माहिती देणे सुलभ व्हावे यासाठी नांदेड परिक्षेत्र स्तरावर ‘खबर’ हेल्पलाइन सुरू करण्यात आली आहे. आपल्या परिसरातील मटका, जुगार किंवा इतर अवैध व्यवसायांची माहिती नागरिकांनी नजीकच्या पोलीस ठाण्यात, nandedrange.mahapolice.gov.in या संकेतस्थळावर किंवा ९१ ५० १०० १०० या ‘खबर’ हेल्पलाइनवर कळवावी, असे आवाहन DIG शहाजी उमाप यांनी केले आहे.
