नांदेड | नांदेड जिल्ह्यातील भू-विकास बँकेकडून कर्ज घेतलेल्या एकूण 5 हजार 106 शेतकऱ्यांचे संपूर्ण कर्ज माफ करण्यात आले असून, त्यांच्या 7/12 उताऱ्यावरील कर्जबोजा कमी करण्याबाबत जिल्हाधिकारी राहुल कर्डिले यांनी 2 फेब्रुवारी रोजी परिपत्रक जारी केले आहे.
या परिपत्रकानुसार जिल्ह्यातील सर्व तहसीलदारांना तालुकानिहाय थकबाकीदार शेतकऱ्यांची यादी देण्यात येणार असून, मंडळस्तरावर विशेष कॅम्प आयोजित करून 7/12 वरील भू-विकास बँकेच्या कर्जबोजाची नोंद कमी करण्याचे व त्याचे प्रमाणपत्र देण्याचे निर्देश देण्यात आले आहेत.
दरम्यान, नांदेड जिल्हा सहकारी कृषी ग्रामीण बहुउद्देशीय विकास बँक (भू-विकास बँक) नांदेड या बँकेची 8 मार्च 2025 रोजी नोंदणी रद्द करण्यात आली आहे. त्याआधीच राज्य शासनाच्या 9 नोव्हेंबर 2022 रोजीच्या शासन निर्णयानुसार महाराष्ट्र राज्य सहकारी कृषी ग्रामीण विकास बँक मर्यादित, मुंबई (शिखर भू-विकास बँक) तसेच जिल्हा भू-विकास बँकांकडून कर्ज घेतलेल्या शेतकऱ्यांचे संपूर्ण कर्ज माफ करण्यात आले होते.
या पार्श्वभूमीवर, भू-तारण बँक, भू-विकास बँक व महाराष्ट्र राज्य सहकारी कृषी ग्रामीण विकास बँक मर्यादित, मुंबई या बँकांचे सभासद असलेल्या शेतकऱ्यांनी आपल्या 7/12 उताऱ्यावर कर्जबोजा कमी झाल्याची खात्री करून घ्यावी, असे आवाहन करण्यात आले आहे. यासाठी शेतकऱ्यांनी तलाठी, तहसील कार्यालय किंवा तालुका सहाय्यक निबंधक, सहकारी संस्था कार्यालयाशी संपर्क साधावा, असे आवाहन शाहुराज हिरे, परिरक्षक – नांदेड जिल्हा सहकारी कृषी ग्रामीण बहुउद्देशीय विकास बँक तसेच जिल्हा उपनिबंधक, सहकारी संस्था, नांदेड यांनी केले आहे.
