Himayatnagar : प्रजासत्ताक दिनी राष्ट्रीय कर्तव्याला हरताळ हिमायतनगर एसबीआय शाखेत ध्वजारोहण न झाल्याने संताप
नांदेड/हिमायतनगर | देशाचा गौरवशाली प्रजासत्ताक दिन साजरा होत असताना हिमायतनगर शहरातील भारतीय स्टेट बँक (SBI) शाखेत मात्र ध्वजारोहणच न झाल्याची गंभीर बाब समोर आली असून, या प्रकारामुळे शहरात तीव्र नाराजी व्यक्त केली जात आहे.
दि. २६ जानेवारी रोजी सर्व शासकीय व निमशासकीय कार्यालयांमध्ये राष्ट्रीय ध्वज फडकावणे अनिवार्य असताना, शहरातील प्रमुख बँक असलेल्या एसबीआय शाखेत ध्वजारोहण करण्यात आले नसल्याचे जागरूक नागरिक व पत्रकारांच्या लक्षात आले. ही बाब उघडकीस येताच शहरात एकच खळबळ उडाली.
📞 शाखाधिकाऱ्यांचे स्पष्टीकरण वादात
या संदर्भात पत्रकारांनी शाखाधिकाऱ्यांशी संपर्क साधला असता, “बँकेत कर्मचारी उपलब्ध नव्हते” असे उत्तर देण्यात आल्याचे सांगितले जाते. मात्र हे कारण नागरिकांना व सामाजिक कार्यकर्त्यांना असमाधानकारक वाटले असून, त्यामुळेच प्रकरण अधिकच चिघळले आहे.
⚖️ ध्वजसंहितेचे उल्लंघन?
प्रजासत्ताक दिनी केवळ ध्वजारोहणच नव्हे, तर डॉ. बाबासाहेब आंबेडकर व महात्मा गांधी यांच्या प्रतिमांचे पूजन करणेही बंधनकारक असताना, हे कोणतेही औपचारिक कार्यक्रम न झाल्याचे समोर आले आहे. यामुळे भारतीय ध्वजसंहिता 2002 च्या नियमांचे उल्लंघन झाल्याचा आरोप होत आहे.
✍️ प्रशासनाकडे लेखी तक्रारी
या प्रकरणी शहरातील जागरूक पत्रकार, सामाजिक संघटनांचे पदाधिकारी, नागरिक यांनी तालुका प्रशासनाकडे लेखी तक्रारी दाखल करत, संपूर्ण प्रकरणाची चौकशी, दोषी अधिकाऱ्यांवर नियमानुसार कारवाई, भविष्यात अशा घटना टाळण्यासाठी स्पष्ट आदेश देण्याची मागणी केली आहे. देशाच्या सार्वभौमत्वाचे प्रतीक असलेल्या राष्ट्रीय ध्वजाबाबत अशी उदासीनता अक्षम्य असल्याची भावना व्यक्त होत असून, प्रशासन आता काय..? भूमिका घेते याकडे सर्वांचे लक्ष लागले आहे.
