हिमायतनगर, अनिल मादसवार| हिमायतनगर तालुक्यातील आंदेगाव (पूर्व) येथे सुरू असलेल्या अवैध देशी दारू विक्रीविरोधात ग्रामस्थांचा संताप अखेर उसळला. मंगळवारी सकाळी गावकऱ्यांनी कारवाई करत दारू विक्रेत्यांचा भांडाफोड केला, देशी दारूच्या बाटल्या फोडल्या आणि संबंधितांना पोलिसांच्या ताब्यात दिले. या घटनेमुळे तालुक्यातील अवैध दारू विक्रीचा प्रश्न पुन्हा ऐरणीवर आला आहे.
गावात गेल्या काही दिवसांपासून दिवसा ढवळ्या अवैध देशी दारू विक्री सुरू होती. त्यामुळे गावात तळीरामांचा हैदोस वाढला होता आणि महिलांसह नागरिकांना मोठा त्रास सहन करावा लागत होता. याबाबत ग्रामस्थांनी पोलिस ठाण्यात तक्रार व निवेदन दिले होते. मात्र कारवाई न झाल्याने दारू विक्रेत्यांचा धंदा सुरूच राहिल्याचा आरोप ग्रामस्थांनी केला.
दरम्यान गावात सुरू असलेल्या अखंड हरिनाम सप्ताहासारख्या धार्मिक कार्यक्रमातही दारू पिऊन धिंगाणा घालण्याच्या घटना वाढल्या होत्या. दारूच्या नशेत घरगुती वाद, महिलांवर मारहाण आणि कुटुंबांमध्ये कलह वाढत असल्याने अनेकांचे संसार उद्ध्वस्त होत असल्याची खंत ग्रामस्थांनी व्यक्त केली.
अखेर संतप्त ग्रामस्थांनी १० मार्च रोजी सकाळी तीन दारू विक्रेत्यांना पकडून चोप दिला तसेच त्यांच्या घरातील देशी दारूच्या बाटल्या फोडून टाकल्या. या घटनेची माहिती मिळताच पोलीस निरीक्षक अमोल भगत, सहायक पोलीस निरीक्षक वाठोरे व पोलिस पथकाने घटनास्थळी धाव घेत पाहणी केली आणि संबंधित दारू विक्रेत्यांना ताब्यात घेतले.
यानंतर गावात पुन्हा अवैध दारू विक्री होऊ नये यासाठी पोलीस पाटील यांनी जबाबदारी स्वीकारत ग्रामस्थांना लेखी आश्वासन दिले आहे. ग्रामस्थांनी मात्र ग्रामीण भागात सुरू असलेल्या अवैध दारू विक्रीवर पोलिस प्रशासनाने कठोर कारवाई करावी, अशी मागणी केली आहे.
“कालच पोलीस उपमहानिरीक्षक शहाजी उमाप यांनी हिमायतनगर पोलीस ठाण्याची वार्षिक तपासणी केली. मात्र दुसऱ्याच दिवशी आंदेगाव येथे अवैध देशी दारू विक्रीचा ग्रामस्थांनी भांडाफोड केल्याची घटना घडली. यावरून तालुक्यातील अवैध देशी-विदेशी दारू विक्रीसह मटका, गुटखा, जुगार, रेती-मुरूम यांसारख्या अवैध धंद्यांवर पोलिसांकडून प्रभावी आळा बसलेला नाही, हे स्पष्ट होते. आता तरी पोलीस उपमहानिरीक्षक शहाजी उमाप यांनी स्वतः लक्ष घालून या अवैध धंद्यांना लगाम लावावा, अशी अपेक्षा नागरिकांकडून व्यक्त होत आहे.”
