नांदेड, अनिल मादसवार| युनायटेड फोरम ऑफ बँक युनियन्स (UFBU) यांच्या आवाहनावरून राष्ट्रीयकृत बँक कर्मचाऱ्यांनी विविध प्रलंबित मागण्यांसाठी देशव्यापी एकदिवसीय संप व धरणे आंदोलन यशस्वीपणे पार पाडले. यामध्ये पाच दिवसीय कार्यालयीन कामाचा आठवडा तात्काळ जाहीर करावा, ही प्रमुख मागणी होती.
या आंदोलनाचा भाग म्हणून आज स्टेट बँक ऑफ इंडियाच्या शिवाजीनगर येथील विभागीय कार्यालयासमोर मोठ्या संख्येने बँक कर्मचारी व अधिकारी धरणे आंदोलनात सहभागी झाले होते. बँक व्यवस्थापनाचे लक्ष वेधण्यासाठी कर्मचाऱ्यांनी घोषणाबाजी करत आपली भूमिका ठामपणे मांडली.
बँक व्यवस्थापनाने बाराव्या द्विपक्षीय करारामध्ये पाच दिवसीय कामाच्या आठवड्याचे आश्वासन दिले होते, मात्र प्रत्यक्ष अंमलबजावणी न करता या मागणीकडे दुर्लक्ष केल्याचा आरोप कर्मचाऱ्यांनी केला. केंद्र व राज्य शासनाच्या कर्मचाऱ्यांना पाच दिवसीय कामाचा आठवडा लागू करण्यात आला असताना, बँक कर्मचाऱ्यांच्या बाबतीत मात्र शासन व व्यवस्थापनाने डोळेझाक केल्याचा रोष यावेळी व्यक्त करण्यात आला. यामुळेच बँक कर्मचाऱ्यांनी आपल्या रास्त मागण्यांसाठी बँक व्यवस्थापनाला जागे करण्याच्या उद्देशाने देशव्यापी एकदिवसीय संप व धरणे आंदोलन छेडले असल्याचे यावेळी सांगण्यात आले.
आंदोलनात सहभागी प्रमुख पदाधिकारी ज्यात SBI ऑफिसर्स असोसिएशनचे मुख्य प्रादेशिक सचिव किरण जिंतूरकर, बँक ऑफ बडोदा एम्प्लॉइज युनियनचे उपमहासचिव (महाराष्ट्र) विनोद गडप्पा,
स्टेट बँक ऑफ स्टाफ युनियनचे उपाध्यक्ष राहुल खेडकर,बँक ऑफ महाराष्ट्र एम्प्लॉईज युनियनच्या उपाध्यक्षा अपर्णा मुखेडकर, SBI स्टाफ युनियनचे प्रदेश सचिव प्रबोधन भावसार, तसेच सौरभ राष्ट्रवार, सय्यद मुजीब, प्रसाद मुघटकर, उमेश आडगावकर, मनोज शिवणगावकर, विशाल वाघमारे, कपिल ढवळे, शिल्पा जिंतूरकर यांच्यासह बँक कर्मचारी व अधिकारी मोठ्या संख्येने उपस्थित होते.
या आंदोलनामुळे बँकिंग सेवा काही काळ प्रभावित झाली असून, पाच दिवसीय कामाचा आठवडा व अन्य मागण्यांबाबत शासन व बँक व्यवस्थापन पुढील काय भूमिका घेते, याकडे आता सर्वांचे लक्ष लागले आहे.
