नांदेड, अनिल मादसवार| किनवट शहरातील एका घरफोडी प्रकरणात पोलिसांनी तपासाची चोख कामगिरी करत आरोपीकडून चोरीस गेलेली मालमत्ता हस्तगत केली होती. सदर प्रकरणातील तपास पूर्ण झाल्यानंतर आज संबंधित तक्रारदारास जप्त मालमत्ता अधिकृतपणे परत करण्यात आली.
१४ मे २०२५ रोजी किनवट येथील धामणदरी येथील एका घरात घरफोडीची घटना घडली, जेव्हा रहिवासी लग्नासाठी बाहेर गेले होते. डुप्लिकेट चावी वापरून सोन्या-चांदीचे दागिने, रोख रक्कम, एकूण ₹६ लक्ष २०,००० चोरीला गेले होते.
एसपी अविनाश कुमार यांच्यासह वरिष्ठ पोलिस अधिकाऱ्यांच्या मार्गदर्शनाखाली किनवट पोलिस ठाण्याने गुन्हा दाखल करून तपास सुरू केला. तपास दरम्यान पोलिसांनी किनवट तालुक्यातील धामंदरी येथील माधव हिरामण राठोड (20) याला अटक केली. आणि 5,50,000 रुपयांची चोरीची मालमत्ता जप्त केली. माननीय न्यायालयाच्या आदेशानुसार जप्त केलेल्या वस्तू तक्रारदार जगदीश भास्कर जाधव यांना परत करण्यात आली असल्याची माहिती नांदेड पोलिस विभागाच्या वतीने प्रेस नोट द्वारे देण्यात आली आहे.
घरफोडीत गेलेली रोकड, दागदागिने आणि इतर मौल्यवान वस्तू तक्रारदारास परत मिळाल्याने त्यांनी पोलिस विभागाचे आभार मानले. या कारवाईसाठी पोलीस निरीक्षकांच्या मार्गदर्शनाखाली स्थानिक गुन्हे अन्वेषण पथकाने महत्त्वाची भूमिका बजावली. या निमित्ताने पोलिसांनी जनतेला आवाहन केले की, अशा घटनांमध्ये त्वरित तक्रार दाखल करावी व पोलिसांना सहकार्य करावे, जेणेकरून तपास अधिक प्रभावीपणे होऊ शकेल.