हिमायतनगर, अनिल मादसवार | श्रावण मासानिमित्त नांदेड-वाघाळा महानगरपालिकेच्या महापौर सौ. कविता संतोष मुळे यांनी हिमायतनगर येथील जागृत देवस्थान श्री परमेश्वर मंदिराला भेट देऊन मनोभावे श्री परमेश्वराचे दर्शन घेतले. यावेळी त्यांच्यासमवेत नांदेड महानगरपालिकेतील सहकारी नगरसेवक व पदाधिकारी उपस्थित होते.
हिमायतनगर तालुक्यातील श्रीक्षेत्र बोरगडी येथील मारुतीरायाचे दर्शन व नगरभोजन कार्यक्रमासाठी महापौर मुळे हिमायतनगर येथे आल्या होत्या. याच दौऱ्यादरम्यान त्यांनी श्री परमेश्वर मंदिराला भेट दिली. यावेळी श्री परमेश्वर मंदिर ट्रस्टच्या वतीने महापौर सौ. कविता मुळे व त्यांच्या सहकारी नगरसेवकांचा श्री परमेश्वराची प्रतिमा देऊन पुष्पहार, शाल व श्रीफळाने स्वागत-सत्कार करण्यात आला. ट्रस्टचे उपाध्यक्ष महावीर सेठ श्रीश्रीमाळ व सर्व संचालक मंडळाच्या वतीने हा सत्कार करण्यात आला.
यावेळी महापौर मुळे यांनी मंदिर परिसराची पाहणी करून मंदिरातील विविध विकासकामांची माहिती जाणून घेतली. श्री परमेश्वर मंदिराची ख्याती दूरदूरपर्यंत पोहोचावी, मंदिराची उत्तरोत्तर प्रगती व्हावी आणि मंदिराच्या सौंदर्यात आणखी भर पडावी, अशी सदिच्छा त्यांनी व्यक्त केली. तसेच मंदिर ट्रस्टच्या पदाधिकाऱ्यांनी केलेल्या स्वागत-सत्काराबद्दल त्यांनी आभार मानले.
यावेळी भावना व्यक्त करताना महापौर कविता मुळे म्हणाल्या, “श्री परमेश्वराचा आशीर्वाद आणि आपल्या सर्वांचा पाठिंबा माझ्या पाठीशी आहे, हे मी माझे भाग्य मानते. श्रावण महिन्यात श्री परमेश्वराचे दर्शन घेण्याचे भाग्य लाभले, त्यामुळे मनाला मोठे समाधान मिळाले. मंदिराच्या पुढील विकासासाठी माझ्या मनःपूर्वक शुभेच्छा आहेत.”
यावेळी नांदेड-वाघाळा महानगरपालिकेचे नगरसेवक तुलजेश यादव, साहेबराव गायकवाड, अभिषेक सौदे, सुमित मुथा, भालचंद्र पवळे, अपूर्व देशमुख, पत्रकार गोविंद करवा, हिमायतनगरचे नगराध्यक्ष शेख रफिक भाई, उपनगराध्यक्ष विनोद गुंडेवार, नगरसेवक डॉ. राजेंद्र वानखेडे, आशिष सकवान, तालुका प्रमुख गजानन चायल, रामभाऊ सूर्यवंशी, श्री परमेश्वर मंदिराचे संचालक लताताई मुलंगे, संचालक मथुराबाई भोयर, संचालक वामनराव बनसोडे, संचालक राजाराम बलपेलवाड, संचालक अनिल मादसवार, संचालक संजय माने, संचालक विलास वानखेडे, कुणबी मराठा महासंघाचे तालुकाध्यक्ष नारायण माने, उदय देशपांडे, मरोतराव लुम्दे, राम पतंगे, बालाजी ढोणे, पंडित ढोणे यांच्यासह असंख्य कार्यकर्ते, भाविक व नागरिक मोठ्या संख्येने उपस्थित होते.
