नांदेड, प्रतिनिधी |विनातिकीट आणि अनियमित प्रवास करणाऱ्या प्रवाशांविरुद्ध दक्षिण मध्य रेल्वेच्या नांदेड विभागाने विशेष मोहीम राबवत मोठी कारवाई केली. २० जुलै रोजी राबविण्यात आलेल्या या विशेष तिकीट तपासणी मोहिमेत ५१९ प्रवासी विनातिकीट अथवा अनियमित प्रवास करताना आढळले. त्यांच्याकडून दंड आणि भाड्यापोटी तब्बल २ लाख ५३ हजार १०५ रुपये वसूल करण्यात आले.
या विशेष मोहिमेत ३१ स्क्वॉड तिकीट तपासनीस सहभागी झाले होते. पथकांनी २७ रेल्वेगाड्यांची सखोल तपासणी केली. सचखंड एक्स्प्रेस, देवगिरी एक्स्प्रेस, नांदिग्राम एक्स्प्रेस, पनवेल एक्स्प्रेस, हडपसर एक्स्प्रेस, तपोवन एक्स्प्रेस, काचेगुडा एक्स्प्रेस आणि रायचूर एक्स्प्रेससह विविध महत्त्वाच्या गाड्यांमध्ये ही तपासणी करण्यात आली.
२८५ विनातिकीट प्रवाशांकडून २.०२ लाख वसूल – तपासणीदरम्यान विनातिकीट प्रवासाची २८५ प्रकरणे आढळली. या प्रकरणांतून २ लाख २ हजार ८६५ रुपये वसूल करण्यात आले. अनियमित प्रवासाच्या १७ प्रकरणांतून ११ हजार ७९० रुपये, तर बुक न केलेल्या सामानाच्या २१७ प्रकरणांतून ३८ हजार १०५ रुपये वसूल करण्यात आले.
रेल्वेचा महसूल बुडविणाऱ्यांवर कारवाई सुरूच – एकूण ५१९ प्रकरणांमध्ये दंडात्मक कारवाई करत रेल्वे प्रशासनाने २ लाख ५३ हजार १०५ रुपयांची वसुली केली आहे. विनातिकीट किंवा अनियमित प्रवास करणाऱ्या प्रवाशांवर आळा घालण्यासाठी तसेच रेल्वेच्या महसुलाचे संरक्षण करण्यासाठी अशा विशेष तिकीट तपासणी मोहिमा यापुढेही नियमितपणे राबविण्यात येणार आहेत. दक्षिण मध्य रेल्वेच्या नांदेड विभागाने प्रवाशांना वैध तिकीट घेऊनच रेल्वे प्रवास करण्याचे आवाहन केले आहे.
