हिमायतनगर (अनिल मादसवार) हिमायतनगर नगरपंचायतीत शिवसेना–भाजपा युतीने संघटनात्मक पातळीवर महत्त्वाची पावले टाकत नेतृत्व अधिक मजबूत केले आहे. आज नगरपंचायतीमध्ये शिवसेना–भाजपा युतीचे गटनेतेपदी आशीषभाऊ सकवान यांची तर स्वीकृत सदस्यपदी डॉ. राजेंद्र वानखेडे यांची नियुक्ती करण्यात आली.
या नियुक्त्यांमुळे नगरपंचायतीतील युतीची भूमिका अधिक प्रभावी होणार असून शहराच्या विकासासाठी समन्वयाने काम करण्यास बळ मिळणार आहे.या प्रसंगी नगरसेविका दर्शना शरद चायल, नगरसेविका अरुणा भगवान मुद्देवाड, नगरसेवक सुभाष बलपेलवाड, नगरसेवक भारत डाके यांच्यासह अनेक पदाधिकारी व कार्यकर्ते उपस्थित होते. सर्व सहकार्य करणाऱ्या नगरसेवकांचे व कार्यकर्त्यांचे यावेळी अभिनंदन करण्यात आले.
नवनियुक्त गटनेते आशीषभाऊ सकवान व स्वीकृत सदस्य डॉ. राजेंद्र वानखेडे यांनी पक्ष नेतृत्वाचे आभार मानत, हिमायतनगरच्या सर्वांगीण विकासासाठी व जनतेच्या हितासाठी कटिबद्ध राहण्याचा निर्धार व्यक्त केला.
डॉ. राजेंद्र वानखेडे हे डॉक्टर असोसिएशनचे तालुकाध्यक्ष असून, त्यांनी नगराध्यक्ष पदासाठी निवडणूक लढवली होती. मात्र, मतदारांनी त्यांना नाकारले होते. त्यानंतर भाजपा शिवसेना युती होऊन त्यांची स्वीकृत सदस्य म्हणून निवड केल्याने त्यांना नगरपंचायत प्रशासनात काम करण्याची संधी मिळाली आहे.
