हिमायतनगर (परमेश्वर काळे) हिमायतनगर नगरपंचायतीच्या आगामी निवडणुकीची रणधुमाळी सुरू झाली असून, प्रत्येक वॉर्डात इच्छुक उमेदवारांनी जनसंपर्क मोहीम गतीमान केली आहे. विशेषतः वॉर्ड क्रमांक 11 मध्ये राजकीय समीकरणे चांगलीच रंगताना दिसत आहेत. या वॉर्डमधून सदाशिव सातव यांनी शिवसेना शिंदे गटाकडून उमेदवारीसाठी प्रबळ दावेदारी केली असून, त्यांना स्थानिक पातळीवर तसेच पक्षाच्या वरिष्ठ नेत्यांकडूनही चांगला पाठिंबा मिळत आहे.
या वॉर्डसाठी ओबीसी आरक्षण सुटले असून, सदाशिव सातव यांनी शिवसेना (शिंदे गट) कडून उमेदवारीसाठी अधिकृतरित्या मुलाखत दिली आहे. पक्षाच्या गटनेत्यांनी घेतलेल्या मुलाखतीत सातव यांनी वॉर्डातील विकासकामांबाबतचे आपले दृष्टीकोन आणि नियोजन मांडले. विश्वसनीय सूत्रांच्या माहितीनुसार, त्यांची उमेदवारी निश्चित मानली जात असून, लवकरच अधिकृत घोषणा होण्याची शक्यता आहे.
सदाशिव सातव हे गेल्या विधानसभा निवडणुकीपासून शिवसेना पक्षाशी निष्ठेने कार्यरत असून, त्यांनी सामाजिक क्षेत्रात आपली मजबूत ओळख निर्माण केली आहे. त्यांच्या पत्नी वॉर्ड क्रमांक 17 च्या नगरसेविका असताना स्थानिक पातळीवर त्यांनी रस्ते, पाणीपुरवठा आणि स्वच्छता यांसारख्या मूलभूत प्रश्नांवर काम केल्याने त्यांचा जनसंपर्क भक्कम आहे.
नांदेड न्यूज लाईव्हशी बोलताना सदाशिव सातव म्हणाले, “हिमायतनगर नगरपंचायतीच्या वॉर्ड क्रमांक 11 मधील नागरिकांच्या अपेक्षा लक्षात घेऊन मी निवडणुकीच्या रिंगणात उतरण्याचा निर्णय घेतला आहे. आमदार बाबुराव कदम कोहळीकर यांच्या आशीर्वादाने आणि कार्यकर्त्यांच्या विश्वासावर ही निवडणूक लढविणार आहे. जनतेच्या समस्यांवर स्थायी उपाय शोधणे आणि वॉर्डचा सर्वांगीण विकास करणे हा माझा प्रमुख ध्येय आहे.”
शिवसेना (शिंदे गट) मध्ये सातव यांच्या नावावर एकमत होत असल्याचे संकेत मिळत आहेत. स्थानिक पातळीवरील शिवसैनिक त्यांच्या उमेदवारीच्या तयारीला लागले आहेत. वॉर्ड क्रमांक 11 मध्ये आधीच इतर पक्षांचेही इच्छुक उमेदवार तयारीत आहेत, त्यामुळे या वॉर्डात त्रिकोणी सामना होण्याची दाट शक्यता व्यक्त केली जात आहे.
राजकीय वर्तुळात चर्चा सुरू आहे की, जर सातव यांना अधिकृत उमेदवारी मिळाली तर त्यांचा विकासाभिमुख दृष्टिकोन आणि स्थानिक जनसंपर्क हे घटक त्यांना प्रबळ आघाडी मिळवून देतील. हिमायतनगर नगरपंचायत निवडणूक – वॉर्ड क्रमांक 11 मध्ये शिवसेना (शिंदे गट) कडून सदाशिव सातव यांच्या उमेदवारीमुळे चुरशीची लढत! होणार असल्याचे संकेत दिसत आहेत.
