हिमायतनगर, अनिल मादसवार| वंचित बहुजन आघाडीचे युवा नेते सुजात दादा आंबेडकर यांच्या गुरुवार सायंकाळी झालेल्या हिमायतनगर भेटीदरम्यान त्यांचे भव्य स्वागत करण्यात आले. नालंदा बौद्ध विहार येथे आकर्षक फटाक्यांच्या आतषबाजीने स्वागत झाल्यानंतर लुंबिनी बौद्ध विहार येथे आयोजित सभेत त्यांनी कार्यकर्ते व समाजबांधवांना मार्गदर्शन केले.
यावेळी सुजात दादांनी काँग्रेसवर जोरदार टीका करत “नांदेड जिल्ह्यात वंचित बहुजन आघाडीने काँग्रेससोबत युती केली होती, मात्र ऐनवेळी काँग्रेसने दगा देत युती तोडली आणि आमच्या विरोधात उमेदवार उभे केले,” असा आरोप केला. “दगा फटका करणाऱ्या काँग्रेसला त्यांची जागा दाखवण्याची वेळ आली आहे,” असे आवाहन त्यांनी मतदारांना केले.
स्थानिक स्वराज्य संस्थांच्या निवडणुका या प्रभागातील दैनंदिन व मूलभूत समस्या सोडविण्यासाठी महत्त्वाच्या असतात, असे सांगत सुजात दादांनी पाणीटंचाई, स्वच्छता, आरोग्य, रस्ते-नाले या तातडीच्या प्रश्नांवर भर दिला. “या समस्या मार्गी लावण्यासाठी वंचित बहुजन आघाडीचे उमेदवार जयश्री विशाल हणवते यांना ‘गॅस सिलेंडर’ या निशाणीवर मतदान करून प्रचंड मताधिक्याने विजयी करा,” असे आवाहन त्यांनी केले.
सभेदरम्यान “सुजात दादा तुम्ह आगे बढ़ो, हम तुम्हारे साथ हैं”, “वंचित बहुजन आघाडीचा विजय असो” अशा घोषणांनी परिसर दणाणून गेला. मोठ्या संख्येने उपस्थित समाजबांधवांनी उत्स्फूर्त प्रतिसाद दिला.