नांदेड| जिल्ह्यातील बिलोली तालुक्यात जादूटोनाचा धक्कादायक प्रकार समोर आला आहे. चोरीच्या संशयावरून दोघांना मंतरलेल्या नागेलीच्या पानाचा विडा थंड पाण्यात बुडवून त्यात तांदूळ टाकून खाऊ घालण्यात आला आहे. या प्रकरणी रामतीर्थ पोलीस ठाण्यात चौघांविरोधात जादुटोना प्रतिबंधक कायद्या अंतर्गत गुन्हा दाखल करण्यात आला आहे. या बाप लेकासह जादूटोना करणाऱ्या भोंदूबाबाचा देखील समावेश आहे. या अघोरी प्रकाराचा व्हिडिओ सोशल मीडियावर व्हायरल झाला असुन या घटनेने एकच खळबळ उडाली आहे.
सविस्तर माहिती अशी की, बिलोली तालुक्यातील केरूर गावात रामा नारायण आरोटे हे आपल्या कुटुंबियांसह वास्तव्यास आहेत. मागच्या महिन्यातील १९ जुलै रोजी त्यांच्या निवासस्थानी चोरी झाली होती. गावातील परमेश्वर राठोड यांच्यावर संशय होता. चोराचा शोध घेण्यासाठी नातेवाईकांनी त्याला मांत्रिकाकडे जाण्याचा सल्ला दिला. त्यानंतर रामा आरोटे यांनी पोलीस ठाण्यात तक्रार दाखल न करता धर्माबाद तालुक्यातील जारीकोट येथील गंगाराम संका कादरी या मांत्रिकाकडे गेले.
सदरील मांत्रीकाने तांदूळ टाकलेले नागेलीचे पानाचे विडे रामा आरोटे यांच्याकडे देत त्यांना तुमच्या घरात चोरी केल्याचा ज्याच्यावर संशय आहे त्यांना थंडगार पाण्यात बुडवून हा विडे खाण्यास द्या, असे सांगितले. त्यानुसार रामा आरोटे यांनी ११ ऑगस्ट रोजी भोंदू बाबांनी दिलेले पानाचे विडे गावातील परमेश्वर कंठीराम राठोड यांना व आणखी (साक्षीदार) एकास खाण्यास दिले. यावेळी विडा खाल्याने परमेश्वर यांच्या शरीराला व मनाला वेदना झाल्या.
विडा खाऊ घातल्याचा व्हिडिओ एकाने आपल्या मोबाईल मध्ये कैद केला. परमेश्वर कांतीराम राठोड यांनी दिलेल्या फिर्यादीवरून रामतीर्थ पोलीस ठाण्यात महाराष्ट्र नरबळी जादूटोणा प्रतिबंधक कायदा प्रमाणे मांत्रीक गंगाराम संका कादरी (राहणार जारिकोट) यांच्यासह रामा नारायण आरोटे (वय 55), गंगाधर रामा आरोटे (वय 30), राजू नारायण आरोटे (वय 40 राहणार केरूर) या चौघा जणाविरुद्ध गुन्हा दाखल करण्यात आला आहे. सहायक पोलीस निरीक्षक विक्रम हराळे यांच्या मार्गदर्शनाखाली बीट जमादार काळे हे पुढील तपास करीत आहे. या घटनेने बिलोली तालुक्यात खळबळ उडाली आहे.