हिमायतनर, अनिल मादसवार| तालुक्यातील आदिवासी बहुल भागात असलेल्या चिंचोर्डी परिसरातील वाशीनजीक बंधारा कम पुलाच्या कामात गंभीर गैरप्रकार उघडकीस येत असून, कंत्राटदाराने दर्जाहीन आणि ‘मातीमिश्रित’ काँक्रीट वापरल्या जात असल्याचा धक्कादायक आरोप राष्ट्रवादी काँग्रेसचे तालुकाध्यक्ष वामनराव पाटील वडगांवकर यांनी केला आहे. तात्काळ बंधारा पुलाच्या कामात दुरुस्ती झाली नाही तर जलसंधारण विभागाच्या विरोधात जन आंदोलन छेडावे लागेल असे त्यांनी पत्रकारांशी बोलताना म्हटले आहे.
हिमायतनगर तालुक्यात येणाऱ्या आदिवासीबहुल भागातील वाशी नजीक कोट्यवधींचा निधी खर्च करून बंधारा कम पुलाचे काम किनवट येथील एका ठेकेदार मार्फत केले जात आहे. काम पूर्ण होण्याआधीच बंधारा पुलाच्या कामाला मोठ्या भेगा पडल्याने नागरिकांच्या सुरक्षेचा प्रश्न ऐरणीवर आला आहे. स्थानिक नागरिकांच्या मते, हा बंधारा परिसरातील शेतकरी व रस्त्याच्या वाहतुकीसाठी धोकादायक ठरत असून, ‘मृत्यूचा सापळा’ बनण्याची भीती व्यक्त होत आहे. अशा प्रकारचे निकृष्ट काम सुरू असतानाही संबंधित जलसंधारण विभागाचे वरिष्ठ व कनिष्ठ अभियंता जाणीवपूर्वक दुर्लक्ष करून आपले उखळ पांढरे करून घेत आहेत की काय..? अशी काही व्यक्त केली जात आहे.
निकृष्ट साहित्य वापरून शासनाची व जनतेची उघड लूट संबंधित ठेकेदार व अभियंत्याकडून करण्यात आल्याचा आरोप होत आहे. या प्रकरणाकडे संबंधित विभागाचे अभियंते जाणीवपूर्वक दुर्लक्ष करत असल्याची चर्चा रंगत असून, कंत्राटदारावर कोणाचे राजकीय संरक्षण आहे का? असा सवाल उपस्थित केला जात आहे.
तातडीने यां रस्ता व पुलाच्या कामाची चौकशी करावी अशी मागणी संतप्त नागरिकांनी केली असून, त्यामुळे या कामाची उच्चस्तरीय चौकशी करून संबंधित कंत्राटदारावर फौजदारी गुन्हा दाखल करावा, तसेच कंत्राटदार एजन्सी चे नाव कायमस्वरूपी काळ्या यादीत टाकावे, अशी जोरदार मागणी केली आहे. प्रशासनाने वेळेत पावले उचलली नाही, तर तीव्र जनआंदोलन उभारण्यात येईल असा इशाराही वामनराव पाटील वडगावकर यांच्यातर्फे देण्यात आला आहे.