नांदेड| भाग्यनगर पोलिसांनी तत्परता दाखवत बॅटरी चोरीच्या गुन्ह्याचा अवघ्या १२ तासांत उलगडा करत आरोपीला अटक केली. या कारवाईत १ लाख ८६ हजार रुपयांचा मुद्देमाल जप्त करण्यात आला आहे.
पोलिसांनी दिलेल्या माहितीनुसार, भाग्यनगर पोलीस ठाण्यात दाखल झालेल्या तक्रारीनंतर तपासाची चक्रे वेगाने फिरवण्यात आली. तांत्रिक तपास व गुप्त माहितीच्या आधारे पोलिसांनी संशयिताला ताब्यात घेत चौकशी केली असता त्याने गुन्ह्याची कबुली दिली.
अटकेत असलेल्या आरोपीकडून ८ बॅटऱ्या (सुमारे ९६ हजार रुपये) आणि एक दुचाकी (९० हजार रुपये) असा एकूण १.८६ लाख रुपयांचा मुद्देमाल हस्तगत करण्यात आला.
ही कारवाई पोलीस अधीक्षक अबीनाश कुमार यांच्या मार्गदर्शनाखाली भाग्यनगर पोलिसांच्या पथकाने यशस्वीरीत्या पार पाडली.
गुन्हेगारांना ठेच देत भाग्यनगर पोलिसांनी दाखवलेली ही जलद कामगिरी नागरिकांमध्ये विश्वास निर्माण करणारी ठरली आहे.
