नांदेड। मुदखेड तालुक्यातील जवळा मुरहार येथील अ. भा. जनवादी महिला संघटनेच्या महिलांनी २३ जून रोजी जिल्हाधिकारी राहुल कर्डीले यांची भेट घेऊन गावात सुरु असलेली अवैध दारू विक्री बंद करण्याची मागणी निवेदनाद्वारे केली.
या मागणीसाठी जमसं च्या वतीने आतापर्यंत सहा वेळा निवेदने प्रशासकीय अधिकाऱ्यांना दिले आहेत.परंतु जवळा येथील दारू बंद न होता अर्जदार महिलांना अनेक त्रासाचा सामना करावा लागत आहे. खाजगी व्यक्ती गावात बेकायदेशीर व विना परवाना दारू विक्री करीत आहेत.
अनेकांचे संसार उध्वस्त होत असल्यामुळे महिला मागील एक वर्षांपासून आंदोलने करीत आहेत. जिल्हाधिकारी महोदयांनी पोलीस अधीक्षक आणि राज्य उत्पादन शुल्क अधीक्षकांना निवेदनाची प्रत व्हाट्सअप द्वारे पाठवून तातडीने कार्यवाही करण्याच्या सूचना दिल्या आहेत.
पुढील आठ दिवसात गावातील दारू विक्री बंद करावी तसेच दारू विक्रेत्यांवर हद्दपारीची कारवाई करावी अशी मागणी महिलांनी केली.
आठ दिवसात कार्यवाही झाली नाही तर जिल्हाधिकारी कार्यालया समोर आमरण उपोषणास बसणार असल्याचा इशारा जवळा मुरहार येथील महिलांनी जिल्हाधिकारी कार्यालय नांदेड येथे दिला आहे.
निवेदनावर जमसं च्या जिल्हाअध्यक्षा कॉ.लता गायकवाड,उपाध्यक्षा कॉ. करवंदा गायकवाड, कॉ. रोहिणी पुंडे,लक्ष्मीबाई पुंडे,कौशाबाई भिसे,सविता गच्चे,अनिताबाई बुक्तरे,प्रभाबाई पुंडे आदींसह इतरही २५ महिलांच्या सह्या आहेत. अशी माहिती जमसं च्या अध्यक्षा कॉ. लता गायकवाड यांनी दिली आहे.
