नवी दिल्ली| परभणी-मुदखेड दुहेरी रेल्वे मार्गाच्या आधुनिकीकरणासाठी भारतीय रेल्वेने १६३ कोटी रुपयांच्या प्रकल्पाला मंजुरी दिली आहे. दक्षिण-मध्य रेल्वेच्या नांदेड विभागातील या महत्त्वपूर्ण मार्गावर विद्यमान विद्युत ट्रॅक्शन प्रणालीचे आधुनिकीकरण करण्यात येणार आहे. त्यामुळे प्रवासी आणि मालवाहतूक रेल्वेची क्षमता तसेच वेग वाढण्यास मदत होणार आहे.
या प्रकल्पांतर्गत सुमारे १६४ ट्रॅक किलोमीटर मार्गावरील १x२५ केव्ही विद्युत ट्रॅक्शन प्रणाली बदलून २x२५ केव्ही अत्याधुनिक प्रणाली बसविण्यात येणार आहे. वाढीव वीजभार हाताळण्यासाठी वीजपुरवठा यंत्रणा, उपकेंद्रे आणि संबंधित पायाभूत सुविधांचेही आधुनिकीकरण केले जाणार आहे. यामुळे रेल्वेगाड्यांना अधिक स्थिर व अखंड वीजपुरवठा मिळून वाहतुकीतील अडथळे कमी होण्याची अपेक्षा आहे.
परभणी-मुदखेड मार्ग हा भारतीय रेल्वेच्या ‘हायली युटिलाइज्ड नेटवर्क’ (HUN Route-9) मधील महत्त्वाचा दुवा आहे. हा मार्ग देशातील विविध प्रमुख शहरांना आणि औद्योगिक क्षेत्रांना जोडतो. त्यामुळे या मार्गाची क्षमता वाढल्याने प्रवासी वाहतूक, उद्योग आणि व्यापाराला मोठा फायदा होणार आहे.
आधुनिकीकरणानंतर ‘वंदे भारत एक्स्प्रेस’सारख्या वेगवान रेल्वेगाड्यांचे अधिक कार्यक्षम संचालन शक्य होण्यास मदत होईल. तसेच मालवाहतूक रेल्वेची वहनक्षमता वाढविण्यासाठीही हा प्रकल्प महत्त्वाचा ठरणार आहे. भारतीय रेल्वेच्या २०२९-३० पर्यंत ३,००० दशलक्ष टन मालवाहतुकीचे उद्दिष्ट गाठण्यासाठीही या क्षमतावाढीचा हातभार लागणार आहे. परभणी-मुदखेड रेल्वे मार्गाच्या आधुनिकीकरणामुळे मराठवाड्यातील रेल्वे वाहतुकीला नवी गती मिळण्याची अपेक्षा आहे.
